Kontrollet e shikimit janë një pjesë e rëndësishme e kujdesit shëndetësor, por jo gjithmonë të lehta për t’u futur në axhendën e përditshme. Pikërisht këtë problem pretendon se ka zgjidhur Eyebot, me një kioskë inovative që redukton kohën e testit të shikimit nga rreth 20 minuta në vetëm 3 minuta.
Pa pasur nevojë për prenotim, pa vizitë klasike tek okulisti dhe pa procesin e lodhshëm të provës me lente korrigjuese.
Edhe pse vizita tek mjeku i syve mund të duket një proces i zakonshëm, kjo teknologji mund të ketë pasoja të mëdha për aksesin në shërbime shëndetësore. Pas testimit personal të pajisjes, përfitimet janë të dukshme.
Sipas CEO-s së Eyebot, Matthias Hofmann, pavarësisht rritjes së platformave online për syze si Warby Parker, rreth 85% e amerikanëve ende preferojnë t’i blejnë syzet fizikisht. Megjithatë, aksesueshmëria mbetet një problem serioz, veçanërisht në zonat ku ka mungesë okulistësh. Në zonat rurale, njerëzit shpesh duhet të udhëtojnë edhe mbi një orë për një kontroll dhe më pas të presin deri në dy javë për të marrë recetën. Pikërisht këto dy probleme synon të zgjidhë kioska Eyebot, duke i lejuar përdoruesit të kryejnë testin e shikimit në çdo moment.
Lexo edhe: CES 2026 – Lajmet më të rëndësishme teknologjike që mund t’i keni humbur!
Procesi i testimit është shumë i thjeshtë. Përdoruesi i afrohet kioskes dhe ndiqet nga udhëzimet në ekranin e madh me prekje. Fillimisht plotësohen disa pyetje bazë kontrolli (testi është i përshtatshëm për personat nga 18 deri në 64 vjeç), më pas realizohet testi klasik me shkronja. Në vijim, përdoruesi duhet të përqendrohet në një imazh, një tullumbace me ajër të nxehtë, dhe në fund të japë adresën e emailit për të marrë recetën.
Edhe pse procesi është i automatizuar, Eyebot thekson se nuk bëhet fjalë për një algoritëm që “hamendëson” rezultatin. Çdo recetë shqyrtohet dhe miratohet nga një okulist i licencuar që punon në distancë, bazuar në të dhënat e mbledhura nga kioska. Në rastin tim personal, rezultati i testit përputhej plotësisht me recetën e marrë një vit më parë nga një vizitë tradicionale tek okulisti.
Megjithatë, duhet theksuar se Eyebot nuk kryen teste mjekësore të avancuara, si matja e presionit të syrit (testi me fryrje ajri) që përdoret për të vlerësuar rrezikun e glaukomës. Për këtë arsye, përdoruesit këshillohen që, pavarësisht këtij shërbimi të shpejtë, të vazhdojnë kontrollet periodike tek mjeku specialist.
Aktualisht, Eyebot operon në një numër të kufizuar dyqanesh Walmart dhe Sam’s Club në Pensilvani, me plane për t’u zgjeruar në të gjithë SHBA-në në të ardhmen e afërt. Në Walmart shërbimi është me pagesë, ndërsa në Sam’s Club përfshihet si përfitim për anëtarët. Hofmann parashikon një të ardhme ku kioskat Eyebot do të jenë të pranishme në qendra tregtare apo dyqane fizike të markave online të syzeve, duke e bërë edhe më të shpejtë dhe më të thjeshtë rrugën drejt një pale syzesh të reja.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
