Më shumë se 80 anëtarë të Parlamentit Evropian i kanë kërkuar Komisionit Evropian që të përfshijë vendet e Ballkanit Perëndimor në Zonën e Roamingut të Lirë.
Në letrën dërguar presidentes së Komisionit Ursula von der Leyen, eurodeputetët thonë se shtetet e Ballkanit Perëndimor janë “partnere të besueshme të Bashkimit Evropian” dhe se është koha që Komisioni Evropian që të paraqesë shpejt një udhërrëfyes të qartë që synon t’i japë fund tarifave shtesë të Roaming-ut midis Bashkimit Evropian dhe Ballkanit Perëndimor, duke zgjeruar kështu Zonën Europiane të Roamingut të Lirë për të mirën e qytetarëve evropianë.
Deputetët thonë se kjo lëvizje duhet të vijë, referuar edhe fjalimit të Von der Leyen në Parlamentin Evropian më 14 shtator, kur ajo u zotua të sillte Ukrainën në zonën europiane të Roaming-ut të lirë.
“Ndërsa ju keni mbështetjen tonë të plotë për këtë përpjekje, ne dëshirojmë të tërheqim vëmendjen tuaj në një rajon tjetër evropian që meriton të përfitojë nga roaming falas, përkatësisht vendet e Ballkanit Perëndimor.Ne kemi nevojë urgjente për një integrim më të ngushtë të vendeve të Ballkanit Perëndimor dhe BE-së, dhe një hap për këtë do të ishte rrëzimi i barrierave në roaming,” mësohet të jetë shprehur Thomas Waitz, eurodeputet dhe bashkëkryetar i Partisë së Gjelbër Evropiane, ndërda shton se “Kjo jo vetëm që do të ndihmojë në mbylljen e hendekut drejt BE-së, por gjithashtu do të ulë pengesat e përditshme të qytetarëve të Ballkanit Perëndimor që jetojnë dhe punojnë në BE, shpesh larg familjeve të tyre, për shkak të tarifave të shtrenjta të Roaming.
Në vitin 2017, Bashkimi Evropian njoftoi se po shqyrtonte uljen e tarifave të Roaming për Ballkanin Perëndimor, pas thirrjeve nga vendet kandidate për të hequr tarifat.
Që nga korriku i vitit të kaluar, gjashtë vende të Ballkanit Perëndimor hoqën tarifat e Roaming-ut në përputhje me Marrëveshjen Rajonale të Roaming-ut të nënshkruar në vitin 2019 në Samitin e dytë Dixhital të Ballkanit Perëndimor në Beograd.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
