Pas një beteje të gjatë ligjore që ka zgjatur me vite, Epic Games ka arritur një fitore të rëndësishme ndaj gjigantit teknologjik Apple. Vendimi i fundit i gjykatës mund të hapë rrugën për rikthimin e lojës ikonike Fortnite në App Store në SHBA, që nga java e ardhshme.
Lexo gjithashtu: Më shumë punë, më shumë shpërblim? Google i jep fund epokës së ‘rehatisë’
Gjykatësja Yvonne Gonzalez Rogers e akuzoi Apple për “shkelje të qëllimshme” të një urdhri gjyqësor të vitit 2021, i cili e ndalonte kompaninë të vendoste kufizime antikonkurruese ndaj zhvilluesve të aplikacioneve. Në vendimin e saj, ajo theksoi se Apple jo vetëm që nuk e zbatoi vendimin, por e bëri këtë në mënyrë të qëllimshme, duke ndërtuar barriera të reja për zhvilluesit.
“Fakti që Apple mendoi se kjo Gjykatë do ta toleronte këtë mosbindje ishte një llogaritje tragjikisht e gabuar. Si gjithmonë, mbulimi i shkeljes e përkeqësoi edhe më shumë situatën,” shkroi gjykatësja Rogers. Ajo e referoi gjithashtu çështjen tek Prokuroria Federale në Kaliforni për hetim penal për përçmim të gjykatës.
CEO i Epic Games, Tim Sweeney, njoftoi në rrjetin X se kompania është gati të rikthejë Fortnite në App Store të SHBA-së. Ai gjithashtu sfidoi Apple që të zgjerojë të njëjtin model “pa taksën Apple” në të gjithë botën.
Lexo gjithashtu: Shqipëri-Kosovë, nga 1 maji hiqen kontrollet kufitare për shtetasit e dy vendeve
“Nëse Apple zgjeron këtë sistem të drejtë edhe globalisht, ne do të rikthejmë Fortnite kudo dhe do të tërheqim çdo proces gjyqësor aktual apo të ardhshëm,” deklaroi Sweeney.
Vendimi është parë edhe nga kompani të tjera të mëdha që kanë qenë të prekura nga politikat kufizuese të Apple. Një zëdhënëse e Spotify e quajti këtë një fitore historike për të gjithë zhvilluesit e aplikacioneve.
“Ky vendim historik është një fitore për zhvilluesit kudo në botë,” tha Jeanne Moran nga Spotify. “Ne do të lëvizim shpejt për të përditësuar aplikacionin tonë dhe për të përmirësuar përvojën e përdoruesve tanë në SHBA.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
