Këtë javë mbyllen aplikimet e sipërmarrjeve në fushën e agrobiznesit për financimet me fonde publike. 17 maji është afati i fundit të dorëzimit të projekteve.
Qeveria shqiptare ka parashikuar këtë vit një fond 5 milionë euro. 4 milionë euro pritet të shkojnë për rritjen e konkurrueshmërisë së produkteve blegtorale dhe të peshkimit. Objektiv është edhe ulja e kostove të prodhimit, nëpërmjet pagesave të kafshëve të matrikulluara, për dorëzimin e qumështit, si dhe për açuge dhe sardele të peshkuara.
Pjesë e mbështetjes brenda këtij fondi janë edhe projektet që synojnë diversifikimin e aktiviteteve ekonomike në zonat rurale.
Për prodhimin e ullirit është parashikuar të jepet pjesa tjetër e fondit, 1 milion euro. Fermerët në këtë rast mund të zhvillojnë projekte zgjerimi me shtimin e sipërfaqeve të mbjella me ullinj, përmirësimin e mekanizimit dhe rritjen e kapaciteteve të prodhimit të vajit të ullirit.
Sipas Ministrisë së Bujqësisë, aplikantët pritet të informohen për përzgjedhjen e mundshme pas dy javesh. Fermerët kanë edhe afat për dorëzimin e dokumentacionit shtesë nëse është e nevojshme deri më 7 Qershor.
Sipas të dhënave nga Agjencia e Zhvillimit Bujqësor dhe Rural, nga muaji prill kur u hap aplikimi, deri më tani kanë paraqitur projektet e tyre të zhvillimit rreth 7500 fermerë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
