Donald Trump nis punë në McDonald’s ?

Ish-presidenti Donald Trump u shfaq të dielën në një McDonald’s pranë Filadelfias, ku përgatiti patate të skuqura, duke i kriposur më shumë se duhet dhe shfrytëzoi rastin për të thumbuar nënpresidenten Kamala Harris.

Franchise në Feasterville ishte e mbyllur për klientët e zakonshëm gjatë këtij aktiviteti fotografik. Klientët që kaluan nëpër shërbimin “drive-thru” ishin përzgjedhur paraprakisht nga franchise dhe ekipi lokal i fushatës së Trump, sipas një burimi të njohur me ngjarjen. Makinat u kontrolluan dhe njerëzit në to u skanuan për siguri, shtoi burimi. Kjo vizitë, vetëm dy javë para Ditës së Zgjedhjeve, ishte një përpjekje për të provokuar Harris, e cila ka përmendur se ka punuar në një restorant McDonald’s gjatë rinisë. Trump e akuzoi pa prova se ajo gënjen për këtë përvojë për të fituar mbështetje në mesin e punëtorëve të thjeshtë. “Ka qenë një pjesë e rëndësishme e CV-së së saj që ka punuar në McDonald’s — sa e vështirë ishte puna,” tha Trump në Feasterville, Pensilvani. “Ajo bëri patatet e skuqura dhe foli për nxehtësinë: ‘Ishte kaq e vështirë.’ Ajo kurrë s’ka punuar në McDonald’s.”

Zëdhënësi i Harris, Ian Sams, reagoi me një deklaratë për NBC News:
“Kur Trump ndihet i dëshpëruar, gjithçka që di të bëjë është të gënjejë,” tha Sams. “Ai nuk mund ta kuptojë çfarë do të thotë të kesh një punë verore, sepse iu dhanë miliona në një tabaka argjendi, që pastaj i shpërdoroi.” Sipas fushatës së Harris, ajo punoi në një McDonald’s në Alameda, Kaliforni, gjatë verës së vitit 1983. Në atë kohë ishte studente në Universitetin Howard dhe punonte në arkë, si dhe me makinat e patateve të skuqura dhe akullores. Pronari i McDonald’s-it në Feasterville, Derek Giacomantonio, deklaroi se vendosi të merrte pjesë në këtë aktivitet fushate, sepse “një nga vlerat themelore të organizatës sonë është të mirëpresim me krenari këdo që viziton komunitetin e Feasterville.”

Dashuria e Trump për ushqimin e shpejtë është e dokumentuar mirë. Gjatë mbylljes së qeverisë në vitin 2019, ai shërbeu McDonald’s, Burger King, Wendy’s dhe Domino’s për ekipin kampion të futbollit të kolegjeve, Clemson Tigers, gjatë vizitës së tyre në Shtëpinë e Bardhë.

Gjatë aktivitetit të së dielës, Trump veshi një përparëse dhe mori një tutorial të shkurtër nga një kuzhinier. Ai më pas hodhi dy tura patate në vajin e nxehtë dhe i priti të gatuheshin. Edhe pse ndoqi kryesisht udhëzimet, harroi të kullojë plotësisht vajin nga një prej tureve dhe dukshëm ishte më dorëlëshuar me kripën.

Lexo edhe:BMW dhe Toyota bashkojnë forcat për të ndërtuar motorin me djegie hidrogjeni

Trump u mahnit nga mënyra se si paketoheshin patatet, me ndihmën e një pajisjeje që i mblidhte ato. “Pa u prekur nga dora e njeriut,” tha ai. “Të pastra dhe të bukura.” Më pas, ai shërbeu tek dritarja e “drive-thru”, duke plotësuar disa porosi dhe biseduar me klientët që kalonin me makinë. “Kjo nuk është situatë e zakonshme, apo jo?” pyeti Trump, duke siguruar klientët se nuk do të paguanin për ushqimin.
“Kjo është nga Trump,” tha ai. “A mund ta bëj këtë?”

Disa klientë përshëndetën Trump me sloganin “Make America Great Again” ndërsa kalonin. “Unë s’do ta kisha problem këtë punë,” tha Trump. “Më pëlqen kjo punë. Do të vija përsëri.”

Ai gjithashtu mori pyetje nga gazetarët e pranishëm, por shmangu një përgjigje të drejtpërdrejtë nëse paga minimale federale duhet të rritet. “Ti je shumë kursimtare me produktin,” i tha ai një punonjëseje që mbushte qeset me patate. “Shikoni, ajo është një punëtore e mirë. Kështu njerëz duhet të keni. I dha një patate për 30 gazetarë.”

Në fund të vizitës, Trump u informua se ishte ditëlindja e 60-të e Kamala Harris. “Do t’i marr disa lule,” tha ai. “Ndoshta do t’i çoj ca patate të skuqura.”