Me zhvillimin e botës dixhitale, marketingu ka hyrë në një fazë rinovimi tërësor. Shqipëria si shumë vende të tjera, vijon të jetë e orientuar nga Televizioni kur flitet për reklamim apo promovim në shitjen e produktit dhe shërbimeve.
Në ditët e fundit të marsit, dhjetëra ekspertë të fushës nga sektori bankar, kompani marketingu, e tregtie, morën pjesë në trajnimin Social Media Marketing & Strategy. Trajnimi dy ditor u organizua nga kompanitë New Media MK dhe New Media Communications.
Në fund të trajnimit intensiv, Darko Buldioski, një nga udhëheqësit e trajnimit, theksoi për BusinessMag se fokusi kryesor ishte tek hartimi i strategjisë, “si të përdorim e si të implementojmë median sociale në biznes. Gjithçka mund të operohet lehtësisht çdo ditë, nëse sipërmarrja ka parasysh pikturën e mëdha të objektivave të saj.”
Ekspertët kujtojnë se jo gjithnjë like & share, janë rezultati më i mirë i marketingut. Edhe në këtë rast, si në një reklamim në TV, objektivi kryesor është shitja e produktit apo shërbimit.
Enea Doku, konsulent në fushën e marketingut dixhital, tregon se ka marrë informacione të dobishme nga trajnimi. “Themi që plani duhet bërë, por asnjë herë nuk arrijmë në fazën e një zbatimi të plotë. Jo vetëm pjesën e krijimit të përmbajtjes së medias sociale për internet, por dhe procesin e realizimit të krijimtarisë, gjetjes së audiencës dhe zhvillimit të fushatës finale. Besoj se të gjithë pjesëmarrësit këtu tashmë do të bëjnë një plan paraprak të marketingut dixhital për 90 ditë apo 120 ditë.”
Gjatë trajnimit, u diskutua kryesisht për marketingun në rrjetet më të mëdha sociale të komunikimit Facebook dhe Instagram, por edhe tema të tjera si Dark Social, Content Marketing, Video, si edhe të punuarit me Influencer.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
