Individët që sigurojnë të ardhura nga më shumë se sa një pagë, nga fillimi i vitit të ardhshëm do të duhet të duhet të deklarojnë të ardhurat dhe të taksohen për to edhe nëse kanë të ardhura nën 2 milionë lekë në vit. Drejtoresha e Tatimeve, Delina Ibrahimaj ka theksuar para mediave se ky vendim po merret për të shmangur evazionin në tregun e punës.
Sipas saj, “Dypunësimi ishte një burim shmangie dhe kjo nuk është e drejtë” Sipas saj janë me dhjetëra mijëra individë (inxhinierë, arkitektë, shefa guzhine, etj.), të cilët kanë bërë shmangie fiskale me qëllim që të deklaronin më pak tatim mbi të ardhurat. Pjesa më e madhe e këtyre individëve janë me paga të larta dhe si rrjedhojë ata i kap tatimi prej 23% për pagat e bashkuara mbi 150 mijë lekë.
Sipas Drejtoreshës së Tatimeve, deklarata e tyre do të jetë më e thjeshtuar.
Projektligji ende në diskutim, ka ngjallur debat mes ekspertësh. Shumë prej tyre kanë theksuar se për deklaratën personale duhet të ketë një vlerë dysheme dhe nuk mund të bëhet edhe nga persona me të ardhura të ulëta, që mund të mos përmbushin as nivelin e minimumit jetik.
Drejtoresha e Tatimeve tha se, “Nga verifikimet e bëra në sistem rezulton se aktualisht janë rreth 24 mijë individë që janë të dy apo trepunësuar tek punëdhënës të ndryshëm. Ato janë në profesione, që mirëpaguhen në tregun e punës, si inxhinierë, arkitektë, ekonomistë, mësues, pedagogë, konsulentë dhe guzhinierë. Në shumë raste ata kanë pozicione drejtuese në kompanitë ku janë të punësuar, si drejtorë ekzekutivë, drejtorë shitjesh, administratorë të kompanive, etj.”
Ndryshimi parashikon të bëhet efektiv me hyrjen në fuqi të ligjit, çka parashikon nisjen e përllogaritjes së të ardhurave të përbashkëta.
Deri më tani, detyrimin për të bërë deklarimin vjetor të të ardhurave e kishin vetëm ata persona që siguronin më shumë se 2 milionë lekë të ardhura.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
