Informacione nga Grokipedia, enciklopedia e gjeneruar nga inteligjenca artificiale dhe e zhvilluar nga kompania xAI e Elon Musk, kanë nisur të shfaqen në disa përgjigje të ChatGPT.
xAI e lançoi Grokipedia-n në tetor, pas kritikave të vazhdueshme të Musk ndaj Wikipedia-s, të cilën ai e ka akuzuar prej kohësh për paragjykim ideologjik kundër konservatorëve. Gazetarët vunë re shpejt se shumë artikuj të Grokipedia-s dukeshin të kopjuar drejtpërdrejt nga Wikipedia, ndërsa të tjerë përmbanin pretendime problematike, si lidhja e pornografisë me krizën e HIV/AIDS-it, “justifikime ideologjike” për skllavërinë dhe përdorimin e termave denigrues ndaj personave transgjinorë.
Këto përmbajtje nuk u konsideruan befasuese për një enciklopedi të lidhur me një chatbot që dikur e përshkroi veten si “Mecha Hitler” dhe që është përdorur për të përhapur deepfake seksualë në platformën X. Ajo që ka ngritur shqetësime është fakti se ky përmbajtje duket se po del jashtë “ekosistemit Musk”.
Lexo edhe:Inflacioni rikthehet në skenë? Alarm i ri për BQE-në në prag të vitit 2026
Sipas një raportimi të The Guardian, modeli GPT-5.2 ka cituar Grokipedia-n nëntë herë, në përgjigje të më shumë se një duzine pyetjesh të ndryshme. Megjithatë, ChatGPT nuk e ka cituar këtë burim kur është pyetur për tema ku pasaktësitë e Grokipedia-s janë dokumentuar gjerësisht, si sulmi i 6 janarit në Capitol apo epidemia e HIV/AIDS-it.
Në vend të kësaj, citimet janë shfaqur në tema më pak të njohura, përfshirë pretendime rreth Sir Richard Evans, të cilat vetë The Guardian i kishte hedhur poshtë më herët. Ndërkohë, edhe chatbot-i Anthropic – Claude – duket se po përdor Grokipedia-n për t’iu përgjigjur disa pyetjeve.
Një zëdhënës i OpenAI i tha The Guardian se kompania “synon të mbështetet në një gamë të gjerë burimesh dhe këndvështrimesh publike”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
