*Nga Elton Dono
Nuk është mbushur java që Senati italian kaloi me votë ligjin e ri që rregullon tregun e bizneseve Call Center që veprojnë brenda apo jashtë territorit italian. Ligji ishte miratuar më parë nga Parlamenti italian, pas muajsh të tërë diskutimesh, e tashmë pritet të hyjë në fuqi shumë shpejt.
Ky ligj, do të ndikojë në mënyrë të drejtpërdrejtë në fitimet e kompanive që operojnë në Shqipëri, si dhe në numrin e punonjësve të tyre, që pritët të pakësohet në mënyrë drastike.
Por çfarë dëgjuam ne këto muaj dhe çfarë po dëgjojmë sot?
Ligji ka muaj të tërë që diskutohet në Itali dhe deri më sot në rangje zyrtare nuk ka lobuar thuajse askush nga autoritetet shqiptare për ndaluar ligjin, ose të paktën për të eleminuar disa pjesë të tij që dëmtojnë drejtpërdrejtë vendet jo anëtare të BE-së.
Në fund të fundit, nga kush duhet ta prisnim këtë lobim?
Nga përfaqësuesit më të prekur të bizneseve natyrshmërisht. Ata e bënë pjesën e tyre me sa mund t’u dëgjohej fjala e nuk ia dolën dot mbanë.
Nga ministrat, apo konsujt apo ambasadorët do të vinte përgjigjia më e plotë.
Por cila ambasadë? Ajo e Milanos që nuk denjon të presë as emigrantët atje dhe ua bën ferr jetën me vonesa e burokracira pa fund?
Nga ministrat e drejtorët që bredhin pa teklif rrugëve të Europës për të bërë blerje, pa çarë kokën aspak për fatin e të rinjve shqiptarë, por vetëm për xhepat e tyre?
Nga kush pra? Këtë duhet të na e thonë ata, Zeusat në krye. Po presim. Por sigurisht nuk kanë për ta bërë. Sepse janë të zënë duke blerë ndonjë fustan online apo blerë bileta për udhëtime diku andej nga Palma de Mallorca, Berlini a SHBA-ja.
Pra lobimi nuk ka ndodhur. E tashmë ne vendosemi përballë faktit të kryer.
Ligji ka kaluar dhe janë në rrezik 25 mijë vende pune. Madje, që pa hyrë në fuqi ligji, disa biznese janë larguar drejt Rumanisë për të shmangur shpenzimet me sistemet e reja që detyron ligji.
25 mijë të rinj, shto këtu edhe familjet e tyre, mund të jenë mbi 100 mijë qytetarë, po diskutojnë çdo ditë fatin, të ardhmen. Atë fat të cilin e ka nëpërkëmbur politika, qeveria a opozita nuk ka aspak rëndësi, secili duhet të kryente kontributin e vet, lobimin me mënyrat e veta.
Por ata nuk e bënë këtë. Sepse janë një llum i përbashkët që mendon vetëm interesat e momentit, e në këtë rast kanë preferuar të qëndrojnë të heshtur.
Jo vetëm që nuk hapin vende pune, por edhe ato që janë të hapura, përpiqen t’i mbyllin drejtpërdrejt ose tërthorazi, kjo s’ka aspak rëndësi.
Ata nuk çajnë kokën për fatin tonë. Fluturojnë në parajsat e tyre mendore jashtë realitetit.
Kurse ne jemi me këmbë në tokë. Të një toke që po i tronditen themelet rëndë.
Burimi: libra.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
