Komiteti i Tregtisë në Senatin e SHBA-së, ka votuar për të thirrur në një përballje drejtuesit ekzekutivë të Google, Facebook dhe Twitter. Kjo do të thotë që Sundar Pichai, Mark Zuckerberg dhe Jack Dorsey, do të përballen me pyetje nga senatorët në lidhje me politikat e tyre për lloje të ndryshme të përmbajtjeve. Seanca do të mbahet më 28 tetor dhe do të zhvillohet virtualisht, transmeton Reuters.
Në fokus do të jetë mbrojtja ligjore që kompanitë gëzojnë në lidhje me përmbajtjet, që lënë dhe heqin në platformat e tyre. Ata gjithashtu do të sfidohen rreth polemikave të shumta që janë bërë kohët e fundit për privatësinë dhe keqinformimin. Në komisionin e mbajtur për të votuar se a duhen thirrur apo jo shefat ekzekutivë të këtyre platformave, si republikanët ashtu edhe demokratët votuan unanimisht për po.
Senatori republikan, Ted Cruz, pas votimit u shpreh me fjalët se “Nuk ka pasur kurrë në historinë e njerëzimit një pushtet të tillë siç e gëzon sot teknologjia, me para të mëdha dhe pushtet monopol. Një fuqi të pakontrolluar”.
Kjo ftesë për shefat e platformave më të mëdha teknologjike, erdhi si pasojë e një seancë të mbajtur në Korrik, ku drejtuesit e Amazon, Apple, Facebook dhe Google dëshmuan para një komiteti, në lidhje me çështjet e konkurrencës dhe pretendimet për paragjykim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
