Ndërsa frika se inteligjenca artificiale (AI) mund të zëvendësojë vendet e punës po rritet, CEO i Nvidia, Jensen Huang, nuk ofron shumë fjalë të mira për punonjësit e zyrave. Përkundrazi, ai thotë se fituesit e vërtetë të epokës së re nuk do të jenë domosdoshmërisht programuesit apo punonjësit e zyrave, por elektricistët, hidraulikët dhe zejtarët e kualifikuar.
Në një intervistë të fundit për Channel 4 News në Mbretërinë e Bashkuar, Huang theksoi se ndërtimi i infrastrukturës fizike që qëndron pas AI-së, veçanërisht qendrat e të dhënave (data centers), do të kërkojë një zgjerim të vazhdueshëm të kapaciteteve. “Segmenti i profesioneve artizanale dhe teknike në çdo ekonomi do të përjetojë një bum,” u shpreh Huang, duke shtuar se ndërtimi i qendrave të të dhënave për AI do të vazhdojë të dyfishohet vit pas viti.
Pse ka rëndësi kjo për ju?
Qoftë për prindërit që po udhëzojnë fëmijët e tyre drejt zgjedhjes së një profesioni, apo për individët që po mendojnë të ndryshojnë karrierë, kuptimi i trendeve reale të tregut të punës, përtej titujve alarmues, mund të jetë vendimtar për të ardhmen financiare.
CEO-t paralajmërojnë mungesë të thellë të profesioneve teknike
Sipas Huang, mundësia e madhe ekonomike nuk qëndron vetëm tek zhvillimi i softuerëve, por tek ndërtimi i infrastrukturës që e bën AI-në të funksionojë. Kjo përfshin ndërtimin dhe mirëmbajtjen e qendrave gjigante të të dhënave. Ky paralajmërim përputhet edhe me shqetësimet e drejtuesve të tjerë të korporatave globale. CEO i BlackRock, Larry Fink, ka ngritur çështjen drejtpërdrejt në nivelet më të larta të politikës amerikane, duke paralajmëruar për mungesën e fuqisë punëtore të kualifikuar. “I kam thënë edhe përfaqësuesve të administratës Trump se do të na mungojnë elektricistët për të ndërtuar qendrat e të dhënave të AI-së. Thjesht nuk kemi mjaftueshëm,” deklaroi Fink në një konferencë për energjinë. Një qendër e vetme të dhënash prej rreth 23,000 m² mund të angazhojë deri në 1,500 punëtorë ndërtimi gjatë fazës së ndërtimit, ku shumë prej tyre fitojnë mbi 100,000 dollarë në vit, pa pasur nevojë për diplomë universitare.
Pas përfundimit, çdo qendër krijon rreth 50 vende pune të përhershme, ndërsa secila prej tyre gjeneron edhe 3.5 vende pune shtesë në ekonominë lokale, sipas një analize të McKinsey. Me investimet globale në qendrat e të dhënave që pritet të arrijnë në 7 trilionë dollarë deri në vitin 2030, sektori i teknologjisë mund të ketë nevojë për një profil shumë ndryshe të fuqisë punëtore sesa deri më sot.
Çfarë tregojnë të dhënat deri tani?
Sipas një studimi të fundit nga Yale Budget Lab, nuk ka ende prova të qarta që AI ka shkaktuar humbje masive vendesh pune, pothuajse tre vjet pas lançimit të ChatGPT në nëntor 2022. Megjithatë, ndryshimet në tregun e punës po ndodhin pak më shpejt sesa gjatë revolucionit të kompjuterëve personalë apo internetit. Edhe në sektorët më të ekspozuar ndaj AI-së – si shërbimet financiare, informacioni dhe shërbimet profesionale – ndryshimet kanë nisur që në vitin 2021, përpara përhapjes së gjerë të AI gjenerative. Të dhënat për të sapodiplomuarit tregojnë disa shenja të hershme ndryshimi, por studiuesit paralajmërojnë se kjo mund të lidhet më shumë me një ngadalësim të përgjithshëm të tregut të punës, që zakonisht prek më fort të rinjtë. “Edhe pse këto gjetje bien ndesh me titujt më alarmues, ato janë në përputhje me precedentët historikë. Ndryshimet e mëdha teknologjike kërkojnë dekada, jo muaj, për t’u reflektuar plotësisht në tregun e punës,” thuhet në analizën e Yale Budget Lab.
AI nuk po zhduk ende masivisht vendet e punës në zyrë. Por ndërtimi dhe mirëmbajtja e infrastrukturës së saj mund të ofrojë siguri më të madhe afatgjatë në tregun e punës. Ndërsa drejtuesit e korporatave paralajmërojnë mungesë të theksuar të profesioneve teknike, punët më të sigurta të epokës së AI-së mund të mos jenë pas tastierës, por në kantierët e ndërtimit të qendrave të të dhënave.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
