Në datën 23 mars 2021 u organizua ceremonia hapëse online e Javës së Parasë për vitin 2021. Kjo javë është një nismë, e cila synon ndërgjegjësimin e brezit të ri për të qenë qytetarë të përgjegjshëm financiarisht në të ardhmen. Në këtë kuadër, Banka e Shqipërisë (BSh) dhe Shoqata Shqiptare e Bankave (AAB), me mbështetjen e Ministrisë së Arsimit, Sportit dhe Rinisë (MASR), Agjencisë së Sigurimit të Depozitave (ASD) dhe ANFE do të organizojnë disa aktivitete edukative nën sloganin “Kujdesu për veten, kujdesu për paratë e tua!”, duke synuar përfshirjen e një numri sa më të madh të rinjsh, me qëllim ndërgjegjësimin e tyre mbi çështje të edukimit financiar.
Aktivitetin çelës të Javës së Parasë 2021 e përshëndetën Guvernatori i Bankës së Shqipërisë, z. Gent Sejko, Ministrja e Arsimit, Sportit dhe Rinisë, zj. Evis Kushi dhe Kryetari i Shoqatës Shqiptare të Bankave, z. Silvio Pedrazzi.
Kryetari i Shoqatës së Bankave të Shqipërisë, z. Silvio Pedrazzi, në fjalën e tij vlerësoi rëndësinë dhe rolin e kursimit dhe qëndrueshmërisë së sistemit bankar në përballimin e pandemisë Covid 19, si prova konkrete për rëndësinë e edukimit financiar. Kjo javë zhvillohet kur bankat janë përfshirë nga revolucioni digjital, i cili bëri të mundur të kapërcehet më lehtë pandemia Covid-19. Paraja në banka është e sigurt dhe të rinjtë dhe të moshuarit kanë nevojë për njohuri financiare. Bankat ofrojnë siguri, janë kontribuuese në rritjen e mirëqenies, zhvillimit të ekonomisë, prandaj duhet besuar te bankat. Z. Pedrazzi siguroi angazhimin e plotë të sektorit bankar në Shqipëri, në bashkëpunim edhe me institucione të tjera dhe me BSh, për të promovuar edukimin financiar në veprimtarinë e tyre ditore dhe në çështjet dhe iniciativat e edukimit financiar.
Lexo: Studimi/ Fëmijët prodhojnë më shumë antitrupa ndaj Covid-19
Më tej, aktiviteti vijoi me ceremoninë e ndarjes së çmimeve për fituesit e konkurseve të organizuara nga Banka e Shqipërisë dhe Shoqata Shqiptare e Bankave me rastin e Javës së Parasë.
Konkursi i parë i organizuar në kuadër të kësaj jave ishte konkursi “Vizatimi më i Mirë” mbi temën “Kujdesu për veten, kujdesu për paratë e tua”, drejtuar nxënësve të klasave të V të vendit. Ky konkurs u mbështet nga Alpha Bank Albania.
Konkursi i dytë mbi fotomontazhet (memet) më të mira për temën, “Kujdesu për veten, kujdesu për paratë e tua!”, drejtuar nxënësve të klasave VII dhe VIII në të gjithë vendin, u mbështet nga FIBank Albania.
Konkursi i tretë me video të krijuara nga nxënësit e shkollave të mesme, ku u trajtua tema “Kujdesu për veten, kujdesu për paratë e tua!”, u mbështet nga Tirana Bank.
Konkursi i katërt mbi postimin më të mirë në Facebook me temë “Ndikimi i Covid-19 në ekonomi dhe kujdesi për financat personale në periudha pandemie”, drejtuar studentëve të degëve Ekonomiks dhe Financë-Bankë, u mbështet nga Banka OTP Albania.
Gjithashtu, në kuadër të Javës Globale të Parasë, në datën 25 mars do të organizohet për herë të tretë Kuizi Evropian i Parasë, një konkurs mbarë evropian me qëllim përmirësimin e kulturës financiare të fëmijëve në moshën 13-15 vjeç (klasat e 9-ta) pavarësisht lëndëve mësimore që zhvillojnë. Kuizi pritet të përfshijë qindra nxënës. Ekipi fitues në rang kombëtar do të konkurrojë në finalen evropiane të Kuizit Evropian të Parasë, i cili do të zhvillohet online më 20 prill 2021.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
