Ndonëse të paktë janë ata që ia dinë vlerën dhe investojnë në të, të enjten në shtëpinë e teknologjisë “Protik”, “Business Mag” ndoqi seminarin “Mining and Trading Cryptocurrencies” për të kuptuar më shumë rreth kriptomonedhave.
Seminari mining dhe trading trajtoi dy pjesë shumë të rëndësishme në botën e kriptomonedhave, dy nga elementët më të përfolur dhe ku ka një nivel të lartë disinformimi, sidomos nga media e gjerë. Kjo ishte dhe arsyeja që nxiti realizimin e këtij seminari me synimin për të informuar dhe edukuar publikun.
Elio Pashaj mbajti një prezantim informues duke krijuar një ide të përgjithshme për kriptomonedhat rëndësinë dhe përdorimin e tyre. Elio është Inxhiner Elektronik dhe i Telekomunikacionit, i cili punon si IT specialist dhe gjithashtu është themelues i Ethereum Albania. Prej më shumë se 1 viti është investitor në kriptomonedha dhe fitues i Nasa Space Application për Shqipërinë, fokusi i tij në të ardhmen do jetë blockchain si një metodë për sigurinë kibernetike.
Gjatë prezantimit u njohëm me histori të ndryshme suksesi dhe dështimi në botën e Bitcoin, si ajo e Erik Finman 11 vjeçari që vodhi 12$ nga pensioni i gjyshes për t’u bërë pjesë e rrjetit të kriptomonedhave. Sot ai gëzon një pasuri me vlerë 1,5 milionë dollarë.
Vëmendja rreth kriptomonedhave po rritet me kalimin e kohës. Aktualisht, kompanitë e ndryshme kanë filluar të investojnë në Miming Farms, një qendër të dhënash e pajisur teknikisht për të ruajtur bitcoin dhe kriptomonedha të tjera. Ajo më e madhja ndodhet në Kinë.
Si çdo gjë dixhitale, siguria është elementi më i diskutueshëm për transaksione të tilla. Sipas Elios, Bitcoin është i sigurtë dhe i pakompromentueshëm. Nëpërmjet grafikëve ai na tregoi se në një Blockchain, Miners-at nuk lejojnë ‘vjedhjen’ e blloqeve nga hakers-at.
Për sa i përket Trading morëm disa këshilla të vlefshme:
- Investo aq sa mund të përballosh humbjet
- Kushtoji rëndësi çmimit të Bitcoin
- Diversifiko portofolin tënd
- Mos u bëni lakmitar (shumë e rëndësishme kjo, nëse nuk doni të humbisni vlera të mëdha)
- Investoni në monedha long-term
- dhe sigurisht, mësoni nga gabimet
Por sa e vlefshme është kjo teknologji në tregun shqiptar?
Klajdi Turlla, pjesë e stafit organizues, tregon se aktualisht ka një interes mjaft të madh nga institucionet private apo publike për të punësuar persona që kanë informacione bazë apo të thelluara në këtë teknologji. Gjithashtu ka persona të cilët po punojnë për iniciativa të reja. Një nga synimet e Blockchain Western Balkans është dhe identifikimi i këtyre personave apo kompanive, për t’i lidhur më pas me komunitetin e gjerë.
Ajo që na bëri më shumë përshtypje ishte interesimi dhe pjesëmaraja e lartë në sallë. Kjo falë angazhimit të Blockchain Western Balkans për të realizuar aktivitete informuese rreth fushës. Tashmë ky komuniteti përbëhet nga më tepër se 500 persona.
Duhet theksuar që synimi i këtij komuniteti është edukimi mbi Kriptomonedhat dhe mbi Blockchain por edhe mbi teknologji të tjera të ngjashme me natyrë të decentralizuar apo siç quhen Distribute Ledger Technologies (DLT).
Në vazhdimësi të këtyre seminareve do të mësojmë akoma dhe më shumë për këtë “rrjet të komplikuar” por inovator. Sepse BusinessMag e përkrah teknologjinë dhe e ardhmja është dixhitale!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
