Bill Gates: rreziku i Covid është ulur shumë, por një tjetër pandemi po vjen

“Ne do të kemi një pandemi të re. Herën tjetër do të jetë një patogjen tjetër”, ka thënë Gates për CNBC.

Në konferencën vjetore të sigurisë në Mynih ai tha se zhvillimi i teknologjisë mjekësore duhet të ndihmojë botën të përballet më mirë me patogjenin e ardhshëm. Sipas Gates, vetëm kjo nuk mjafton.

“Nëse çdo vend do të bënte atë që bëri Australia, atëherë ne nuk do të flisnim për një pandemi”, shtoi Gates. Australia aplikoi masat më të ashpra kundër pandemisë, kur Sidnei dhe Melburn përjetuan bllokimet më të gjata dhe lëvizja e njerëzve të pavaksinuar u kufizua shumë.

Më vonë, vendi prezantoi rregulla që ndalonin personat e pavaksinuar të ushtronin profesione të ndryshme. Kjo ishte edhe arsyeja që Novak Gjokoviç nuk u pranua në Australian Open.

Gates thekson se, përveç masave, nevojitet një investim prej të paktën 3.5 miliardë dollarësh për të zhvilluar më shpejt vaksinat për pandeminë e ardhshme dhe për të vaksinuar pastaj sa më shumë njerëz.

Lexo: Fundi i Pandemisë: Çfarë do të thotë Covid ‘Endemik’ dhe kur mund të arrijmë atje?!

“Herën tjetër ne duhet të përpiqemi t’i realizojmë ato jo në dy vjet, por në gjashtë muaj”, tha Gates, duke marrë për bazë ritmin e vaksinimit.

Ai deklaroi se ishte “shumë vonë” për të arritur qëllimin e Organizatës Botërore të Shëndetësisë për të vaksinuar 70% të popullsisë së botës deri në mesin e vitit 2022. “Deri në fund të vitit 2022, ne duhet të kthehemi në normalitet”, tha bashkëthemeluesi i Microsoft një vit më parë.

Gates dha dorëheqjen si kryetar i Microsoft në 2014-ën dhe ka investuar të paktën 1.75 miliardë dollarë në luftën globale kundër Covid-19, përmes Fondacionit të tij Bill dhe Melinda Gates.

Ai ka mbështetur zhvillimin e vaksinave të reja, duke sponsorizuar më shumë se 250 milionë dollarë dhe 156 milionë të tjera për skemën Covax, e cila u krijua për të siguruar që vendet me të ardhura më të ulëta të kenë akses në ilaçet dhe vaksinat kundër koronavirusit.

CNBC