Vepra provokuese e artit e Maurizio Cattelan, një banane e ngjitur me shirit ngjitës në mur, është shitur për 6.2 milionë dollarë (4.9 milionë paund) në ankand në Sotheby’s në New York, një shumë katërfish më e lartë se vlerësimet para shitjes.
Shtëpia e ankandit njoftoi se Justin Sun, një sipërmarrës kinez në fushën e kriptomonedhave, tejkaloi gjashtë rivalë të tjerë për të fituar instalacionin “Komedianti” të artistit italian të artit vizual, të mërkurën.
“Ditët në vijim, do ta konsumoj personalisht bananen si pjesë e kësaj eksperience unike artistike,” është cituar të ketë thënë zoti Sun.
Banania e ngjitur me shirit – tashmë ndoshta një nga frutat më të shtrenjtë të shitur ndonjëherë – u ble fillimisht gjatë ditës për vetëm 0.35 dollarë, sipas New York Times. “Komedianti” u zbulua për herë të parë për publikun në vitin 2019, duke u kthyer menjëherë në një sensacion viral dhe duke nxitur debate të ashpra mbi atë që quhet art. Instalacioni – i cili ka udhëtuar nëpër botë – përfshin udhëzime për zëvendësimin e bananes sa herë që ajo prishet.
Lexo edhe:Çmimet e vajit të ullirit janë në rrugën e përgjysmimit, thotë prodhuesi më i madh në botë!
Në fakt, ky frut është konsumuar dy herë deri tani. Në vitin 2023, një student i artit nga Koreja e Jugut e mori bananen nga muri kur instalacioni u ekspozua në Muzeun e Artit Leeum në Seul. Më pas, muzeu vendosi një banane të re në të njëjtin vend, raportuan mediat lokale. Katër vite më parë, një artist performues e hoqi bananen nga muri pasi vepra ishte shitur për 120,000 dollarë në Art Basel, në Miami. Bananja u zëvendësua menjëherë dhe nuk u ndërmor asnjë veprim tjetër.
Justin Sun drejton rrjetin blockchain Tron, i cili mundëson disa transaksione me kriptomonedha. Vitin e kaluar, Komisioni Amerikan për Letrat me Vlerë dhe Shkëmbime (SEC) e akuzoi atë për mashtrim, duke thënë se ai kishte rritur në mënyrë të rreme vëllimet tregtare të TRX, tokenit të kriptomonedhës së Tron-it. Zoti Sun i mohon këto akuza.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
