Bëhuni gati për selfie “jashtë kësaj bote”. Për herë të parë, astronautët e NASA-s do të lejohen të marrin smartphone-t e tyre në hapësirë, duke nisur nga misionet Crew-12 dhe Artemis II.
Crew-12 pritet të niset drejt Stacionit Ndërkombëtar Hapësinor javën e ardhshme, ndërsa misioni shumë i pritur Artemis II, që do t’i çojë njerëzit rreth Hënës për herë të parë që nga vitet 1960, është shtyrë për në muajin mars.
“Po u japim ekuipazheve mjetet për të kapur momente të veçanta për familjet e tyre dhe për të ndarë imazhe dhe video frymëzuese me botën,” shkroi në X administratori i NASA-s, Jared Isaacman.
Me iPhone-t më të fundit dhe pajisje Android në dorë, astronautët do të kenë më shumë liri dhe spontanitet në realizimin e fotove dhe videove. Kjo do të thotë që për ne këtu në Tokë, këto udhëtime në hapësirë mund të jenë ndër më të dokumentuarat ndonjëherë nga NASA.
Imagjino sa “cool” (ose pak të sikletshme) do të jenë momentet kur astronautët kthehen në yje të TikTok-ut në mungesë graviteti, apo kur bëjnë selfie me kënd ultra të gjerë brenda anijes kozmike. Përtej anës argëtuese, edhe për burokracinë shtetërore ky vendim duket se ka qenë një hap emocionues, pasi rregulli i ri u miratua relativisht shpejt.
Lexo edhe: Truri, deri 32 vjeç në adoleshencë
“Po aq e rëndësishme, ne sfiduam procese të vjetra dhe certifikuam pajisje moderne për fluturime hapësinore në një afat të përshpejtuar,” shkroi Isaacman. “Kjo urgjencë operacionale do t’i shërbejë mirë NASA-s teksa ndjekim kërkime shkencore me vlerë të lartë, si në orbitë ashtu edhe në sipërfaqen e Hënës.”
Është e kuptueshme pse futja e teknologjive të reja në hapësirë është e ndërlikuar: mjafton një detaj i vogël që të shkojë keq dhe një mision i tërë mund të rrezikohet. Deri më tani, kamerat që NASA kishte planifikuar të përdorte në këto misione ishin Nikon DSLR dhe GoPro, modele që datojnë rreth një dekadë më parë, sipas Ars Technica. Nuk janë aspak pajisje të vjetruara, por përdorimi i një smartphone-i sjell një ndjesi më spontane dhe më njerëzore të dokumentimit të përvojës.
Vlen të theksohet se kjo nuk është hera e parë që smartphone-t shkojnë në hapësirë. SpaceX i ka lejuar ato edhe në misionet private me astronautë. Megjithatë, për NASA-n ky është një ndryshim i rëndësishëm kulture dhe qasjeje, që e afron më shumë hapësirën me publikun e gjerë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
