Melanie Perkins nuk kishte si qëllim të ndërtonte një platformë softuerike të dashur nga miliona njerëz, e cila sot fuqizon ekonominë e pavarur (gig economy). Por ja që kështu ndodhi. Në fakt, gjithçka nisi shumë më thjesht: ajo thjesht donte që studentët e saj të mos vuanin. Gjatë kohës që ishte studente në Australi, Melanie jepte mësime bazë dizajni. Çdo semestër shihte të njëjtën skenë: studentët uleshin përballë kompjuterit, hapnin programin e dizajnit, shikonin ekranin… dhe mbeteshin të paralizuar nga vështirësia.
Në atë kohë, rreth një dekadë më parë, programet e dizajnit ishin tepër të komplikuara, të ngadalta dhe aspak miqësore për përdoruesin. Melanie e kuptoi se duhej të ekzistonte një mënyrë më e thjeshtë. Ajo nuk e nisi menjëherë me Canva (përndryshe nuk do të kishim një histori kaq interesante). Fillimi ishte shumë më modest. Së bashku me të dashurin e saj, Melanie krijoi një mjet të thjeshtë online për shkollat, që t’i ndihmonte të përgatisnin vitaret (yearbooks). Punonin nga dhoma e ndenjjes në shtëpinë e nënës së saj. Nuk ishte asgjë madhështore. Por funksiononte. Ishte i thjeshtë. I kuptueshëm. Praktik.
Zgjidhte një problem real, një mësim shumë i rëndësishëm për çdo sipërmarrës. Shkollat e pëlqyen. Suksesi nuk ishte i jashtëzakonshëm, por sinjali ishte i qartë: njerëzit donin softuer dizajni që kishte kuptim. Ky hap i vogël hapi derën për një ide shumë më të madhe.
Lexo edhe:Apple planifikon deri në shtatë modele iPhone deri në vitin 2027
“Jo, jo dhe sërish jo”
Melanie filloi t’u prezantonte investitorëve idenë për një platformë më të madhe, më të fuqishme – atë që më vonë do të bëhej Canva. Përgjigjja? “Jo.” Më shumë se 100 herë “jo”. Për tre vite me radhë. Por ajo nuk u dorëzua. Përmirësonte prezantimin, takonte këdo që mundej, dëgjonte kritikat, mësonte, rregullonte. Një investitor i tha jo, por e lidhi me dikë tjetër. Ai dikush tjetër e prezantoi me një tjetër. Dhe, në fund, një nga ato lidhje u kthye në “po”-në e parë të vërtetë. Më në fund! Nuk ishte fat. Ishte këmbëngulje mbi këmbëngulje.
Momentet vendimtare
Me mbështetjen e parë financiare, Melanie dhe ekipi i saj i vogël ndërtuan versionin e parë real të Canva-s. Ishte i pastër, i thjeshtë dhe jashtëzakonisht i lehtë për t’u përdorur.
Më në fund, ekzistonte një program dizajni që edhe njerëzit e zakonshëm mund ta përdornin pa stres.
Kur u lançua, reagimi ishte i menjëhershëm.
“Sa e lehtë!”
“Sa intuitive!”
“Sa e shpejtë!”
Njerëzit filluan ta përdornin për logo, fletëpalosje, prezantime, postime për rrjete sociale, CV. Pastaj ftonin kolegët e tyre. Produkti u përhap shpejt dhe në mënyrë organike. Dhe pa e kuptuar, projekti i nisur nga një dhomë ndenjeje u shndërrua në një nga mjetet e dizajnit më të përdorura në botë.
Efekti zinxhir
Sot, Canva ka qindra miliona përdorues. Melanie Perkins është një nga miliarderet femra më të reja self-made në botë. Kompania vlerësohet në miliarda dollarë. Dhe ajo ende e drejton së bashku me të njëjtët dy bashkëthemelues që ishin aty që në fillim. Jo keq për një biznes që lindi thjesht sepse një studente u lodh duke parë të tjerët të frustruar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
