Një adoleshent 13-vjeçar në Florida u arrestua pasi përdori ChatGPT për të bërë një pyetje që tronditi autoritetet shkollore dhe policinë: “Si mund ta vras shokun tim gjatë orës së mësimit?”. Pyetja, e bërë përmes një pajisjeje të shkollës, aktivizoi menjëherë sistemin e sigurisë së institucionit. Sistemi i monitorimit të drejtuar nga inteligjenca artificiale GaggleAI dërgoi menjëherë një alarm tek oficeri i policisë përgjegjës për sigurinë e kampusit. Sipas rrjetit lokal NBC (WFLA), polici arriti të lokalizojë dhe arrestojë nxënësin në shkollën “Southwestern Middle School” në qytetin DeLand, rreth një orë në veri të Orlandos.
Pamjet e shpërndara në rrjetet sociale tregonin momentin kur 13-vjeçari dilte me pranga nga automjeti i policisë. Adoleshenti deklaroi më vonë se pyetja ishte “vetëm një shaka me shokun”. Megjithatë, për shkak të historisë së gjatë të sulmeve të armatosura në shkollat amerikane, përfshirë masakrën në shkollën “Marjory Stoneman Douglas” në Parkland, Florida, ku u vranë 17 persona autoritetet nuk e morën lehtë incidentin.
Në Gjermani, ngjarje të ngjashme me kërcënime për bomba në shkolla janë raportuar në maj, por rezultuan të jenë kopje të njëjtës mesazh, dhe policia njoftoi shpejt se nuk kishte rrezik real.
Lexo edhe: Qëndrueshmëria, nga kërkesë ligjore në një domosdoshmëri për bizneset në epokën e gjelbër
Thirrje për kujdes nga prindërit
Pas incidentit, autoritetet i bënë thirrje prindërve të jenë më vigjilentë ndaj mënyrës se si fëmijët e tyre përdorin internetin, veçanërisht platformat e kërkimit dhe chatbot-ët me inteligjencë artificiale. “Një shaka e vetme mund të shndërrohet në një emergjencë shkollore,” deklaroi zyra e policisë së qarkut. “Prindër, flisni me fëmijët tuaj që të mos përsërisin një gabim të tillë.”
Megjithëse GaggleAI konsiderohet efektiv për zbulimin e hershëm të sjelljeve të rrezikshme, sistemi është kritikuar për shkak të numrit të lartë të alarmeve të rreme dhe për ndërhyrjen e tepruar në privatësinë e nxënësve. Debati mbetet i hapur midis atyre që theksojnë nevojën për siguri dhe atyre që paralajmërojnë për një ambient shkolle të ngjashëm me “shtetin e mbikëqyrjes”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
