Drejtoria e Përgjithshme e Tatimeve në një deklaratë për mediat, bën me dije se lufta kundër informalitetit nuk është një plan i përkohshëm masash. Ajo është vullnet i fortë i Qeverisë Shqiptare, për të garantuar rregulla të barabarta në treg.
E gjithë kjo bëhet me qëllim mbështetjen e biznesit që respekton rregullat dhe punon çdo ditë për të siguruar fitime në mënyrë të ndershme. Nuk do të ketë më bare, lokale apo hotele që operojnë në treg pa NIPT-e. Gjithashtu nuk mund të ketë biznese që raportojnë xhiro sa një ambulant. Kjo bie ndesh me parametrat e barazisë në treg. Mbi të gjitha kjo dëmton të gjithë qytetarët që kërkojnë me të drejtë shërbime publike të merituara, sepse ata paguajnë TVSH në çdo blerje që bëjnë.
Për këtë arsye Administrata Tatimore dhe veçanërisht Strukturat e Monitorimit në terren, po zbatojnë këtë plan operacional. Operacion ky që do të jetë sistematik, i bashkërenduar dhe i koordinuar nga Ministria e Financave. Operacioni do të përfshijë të gjithë vendin.
Gjatë periudhës 01-21 Korrik, janë kontrolluar 1,064 subjekte, ndërsa në 367 prej tyre, janë konstatuar shkelje të legjislacionit tatimor. Operacioni synon që deri në fund të vitit të jenë kontrolluar 6200 subjekte.
Së shpejti do të kemi edhe një Applikacion Stop Informalitetit, për të lehtësuar këtë komunikim.
Lexo: 18 mijë biznese paralajmërohen nga tatimet për shkeljet që bëjnë gjatë aktivitetit privat
Bilanci i shkeljeve nga kontrollet është si më poshtë:
- 62 subjekte janë konstatuar të paregjistruara në organet tatimore, për të cilët është marrë masa e bllokimit deri në momentin e regjistrimit të tyre pranë QKB dhe organeve tatimore.
- 53 tatimpagues janë penalizuar pasi janë konstatuar me punonjës të padeklaruar.
- 106 tatimpagues të penalizuar për moslëshimin e kuponit tatimor (rasti i parë), ndërsa 12 tatimpaguesve u janë bllokuar ambientet për 30 ditë kalendarike për moslëshim kuponi tatimor (hera e dytë).
- 12 tatimpagues janë konstatuar pa pasjisje fiskale dhe 12 të tjerë nuk i mbanin pajisjet fiskale në gjendje pune.
- 20 tatimpagues janë konstatuar se dispononin mallra pa dokumentacion tatimor.
“Lufta ndaj Informalitetit na përket të gjithëve, ndaj i lutemi çdo subjekti apo konsumatori të na bashkohet, duke bërë me dije rastet kur konstatojnë parregullsi, si nga ana e bizneseve, por edhe për punonjësit tanë, nëse abuzojnë me detyrën e tyre”, – tha në deklaratën zyrtare për mediat Drejtoria e Tatimeve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
