Nga Paul Ryan
Imagjinoni një botë ku Kina ka zëvendësuar Shtetet e Bashkuara në krye të ekonomisë globale dhe renminbi, jo dollari, është valuta rezervë globale. Ky skenar do të ishte katastrofik për qytetarët, bizneset dhe aleatët amerikanë. Duke pasur parasysh borxhin e lartë dhe shpenzimet e pakontrolluara të Amerikës, një rënie në kërkesën për asete në dollar do të godiste rëndë ekonominë amerikane. Qeveria do të detyrohej të shkurtonte shërbimet publike dhe shpenzimet ushtarake, duke ndryshuar pothuajse çdo aspekt të jetës amerikane dhe jo për mirë.
Edhe më keq, Partia Komuniste e Kinës (PKK) do të kontrollonte sistemet globale të pagesave dhe infrastrukturën financiare. Kjo do t’i lejonte PKK-së të ushtronte ndikimin e saj dhe të eksportonte sistemin e saj të mbikëqyrjes në të gjithë botën, duke izoluar SHBA-në dhe aleatët e saj me një mur sanksionesh. Nëse një individ, ose biznes amerikan kritikonte liderët e Kinës, ata mund të përjashtoheshin menjëherë nga tregtia globale.
PKK po përpiqet ta bëjë këtë realitet. Në lidhje me Iniciativën “Rruga dhe Brezi”, e cila ka zgjeruar masivisht ndikimin kinez duke ofruar fonde për projekte të mëdha infrastrukturore dhe teknologjike në ekonomitë në zhvillim, Kina po i kushton burime të konsiderueshme krijimit të një alternative ndaj sistemit të pagesave në dollarë. Në vitin 2021, qeveria kineze bëri një hap të rëndësishëm në këtë drejtim me lancimin e një monedhe dixhitale nga banka qendrore (CBDC).
Për të zgjeruar përdorimin e renminbi-t dixhital, Banka Popullore e Kinës (BPK) po udhëheq përpjekjet për krijimin e një platforme për zgjidhjen e menjëhershme të pagesave ndërkufitare. Projekti mBridge, që nënkupton “ura e CBDC-ve të shumëfishta” dhe është zhvilluar në bashkëpunim me disa banka të tjera qendrore, synon të lidhë bankat tregtare, bizneset dhe autoritetet monetare në një rrjet të shpërndarë për flukset tregtare dhe financiare. Shumë banka qendrore perëndimore, duke përfshirë Bankën Qendrore Evropiane dhe Rezervën Federale të Nju Jorkut, si dhe Banka Botërore dhe bankat tregtare, i janë bashkuar projektit si vëzhgues, por kanë pak ndikim mbi dizajnin dhe detajet teknike të tij.
Nëse mBridge është i suksesshëm, do të forconte përpjekjen e Kinës për të zgjeruar fuqinë e saj valutore. Ka shenja të hershme që kjo strategji po jep rezultate. Në prill, të dhënat nga SWIFT, rrjeti i pagesave ndërbankare me qendër në Bruksel, treguan se përqindja e renminbi-t në pagesat ndërkombëtare ishte në nivelin më të lartë të të gjitha kohërave, duke kaluar yen-in dhe duke u bërë valuta e katërt më e përdorur në transaksionet ndërkufitare. Edhe pse renminbi ka ende shumë për të bërë para se të kërcënojë seriozisht dollarin, mBridge do ta përshpejtojë këtë prirje.
Dollari ka mbizotëruar për gati një shekull sepse mbështetet nga një sistem ligjor i mirënjohur, një ushtri e fuqishme dhe një ekonomi dinamike. Por, politikëbërësit amerikanë nuk mund të rrinë duarkryq ndërsa bota ndryshon. Një herë e një kohë, paundi britanik ishte valuta dominuese për tregtinë ndërkombëtare dhe rezervat e huaja, derisa nuk ishte më. Nëse dollari do të shmangë të njëjtin fat, udhëheqësit amerikanë duhet të njohin se sistemi financiar amerikan ka nevojë të përmirësohet. Ndërsa jeta dhe ekonomitë tona po dixhitalizohen gjithnjë e më shumë, ashtu duhet të ndodhë edhe me dollarin.
Lexo edhe: Konferenca Allweb, mbi 300 pjesëmarrës nga marketingu, shitja dhe sipërmarrja
Sfida kryesore për zyrtarët amerikanë është të përditësojnë arkitekturën financiare globale në një mënyrë që të sigurojë përdorimin e vazhdueshëm të dollarit si një instrument për promovimin e lirisë ekonomike globalisht. Zgjidhja qëndron në një shtyllë kryesore të fuqisë së butë amerikane: inovacioni teknologjik. Me fjalë të tjera, një sistem pagesash i ndërtuar nga sektori privat në SHBA është më i mirë se ai i ndërtuar nga BPK duke përdorur teknologji kineze. Përveç vendosjes së rregullit fiskal në vend, politikëbërësit duhet të mbështesin sipërmarrësit që emetojnë monedha të qëndrueshme (stablecoins) mbi bazën e bllokchain-it.
Stablecoins, pothuajse të gjitha të mbështetura nga dollari, mund të sigurojnë kërkesë për borxhin e qeverisë amerikane duke rritur pozicionin global të dollarit dhe duke e zgjeruar shtrirjen e tij në platforma të reja dixhitale që fuqizojnë përdoruesit dhe mbrojnë privatësinë dhe sovranitetin individual. Por, për të inkurajuar adoptimin e tyre, politikëbërësit duhet të krijojnë një kornizë rregullative të përshtatur që ofron një farë sigurie ligjore si për emetuesit ashtu edhe për mbajtësit e monedhave dhe që promovon inovacion të mëtejshëm. Sistemi i pagesave në dollar është nën sulm. Duke pasur parasysh atë që është në lojë, mbrojtja e të ardhmes së tij duhet të bëhet një prioritet kombëtar i sigurisë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
