Një makinë fluturuese, e prodhuar nga një kompani japoneze, ka kaluar me sukses testin e parë. Më 25 gusht, Sky Drive Inc. zhvilloi provën e parë në bazën e saj në Japoni ku makina e quajtur SD-03, bashkë me një pilot u ngrit në ajër dhe fluturoi rreth fushës për katër minuta. Kjo është prova e parë publike për një makinë fluturuese në historinë japoneze.
“”Ne jemi jashtëzakonisht të ngazëllyer që arritëm të realizonim fluturimin e parë të një makine japoneze së bashku me pilotin, brenda dy viteve të themelimit të Sky Drive. Ne duam që të krijojmë një shoqëri ku makinat fluturuese të jenë një mënyrë transporti normale dhe njerëzit të jenë në gjendje t’i përdorin në mënyrë të sigurt dhe të rehatshme”, tha CEO i kompanisë, Tomohiro Fukuzawa.
SD-03 është makina më e vogël elektrike që ngjitet në ajër vertikalisht, duke zënë hapësirën e dy makinave të parkuara, sipas kompanisë. Ajo ka 8 motorë, për të siguruar fluturimin edhe në situatat më emergjente.
Kompania shpreson që makina të jetë pjesë e jetës së përditshme dhe jo një objekt luksi, por ende nuk ka dalë me një çmim për të. Testime të tjera do të pasojnë në muajt në vijim për t’u siguruar që teknologjia përputhet me standardet e rrugës dhe ajrit. Viti 2023 është vendosur si objektiv për ta nxjerrë në shitje.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
