Agropërpunuesit kërcënojnë se nuk do të blejnë më qumësht tek fermerët, nëse nuk rishikohet TVSH

Përpunuesit e Industrisë Ushqimore kanë shtyrë afatin për transferimin e taksës tek fermerët, furnitorë të tyre, por paralajmërojnë se pas një jave, me 14 Mars nuk do të grumbullojnë asnjë litër qumësht nëse kërkesat e tyre nuk merren parasysh.

Ata gjenden para detyrimit për të paguar 14% Tatim mbi Vlerën e Shtuar, ndërsa fermeri paguan vetëm 6%. Sipas tyre, detyrimi 20% e TVSH-së i duhet paguar në shtet nga prodhuesit e produktit.

Ndryshimi shqetësues për prodhuesit erdhi në fillim të muajit Dhjetor, ku në Ligjin për TVSH-në u zëvendësuan tek “Norma e kompensimit të prodhuesit bujqësor”, fjalët “20 për qind” me fjalët “6 për qind”.

Prodhuesit e kanë ngritur shqetësimin edhe më parë, ndërsa thonë se, kanë kaluar tre muaj takime pa një zgjidhje të situatës. Sipërmarrja është rënduar edhe nga pagesa e TVSH-së për llogari të fermerëve.

Sipërmarrësit paralajmërojnë se disa ndërmarrje mund të shkojnë deri në faliment për shkak të taksave të padrejta.

Një ditë më parë, sipërmarrësit agropërpunues kanë takuar Ministrin e Bujqësisë dhe Zhvillimit Rural Bledi Çuci, Zv. Ministrin e Ekonomisë dhe Financave Z. Elton Haxhi dhe ekipet e këtyre dy ministrive. Pas këtij takimi, ata vendosën të shtyjnë me një javë masat e tyre drastike për të mos blerë qumësht tek baxhot dhe fermerët e tjerë.