Reuters në një vrojtim të tij, thotë se Serbia po i drejtohet teknologjisë për të dalë nga ngërçi ekonomik.
Serbia, një vend që pretendon se shpikësi Nikola Tesla është një prej bijve të saj më të famshëm, po shikon teknologjinë si mundësinë për të nxjerrë veten nga situata “e ngrirë” ekonomike ku ndodhet që prej viteve ’90.
Ndërsa është një “lojtar” i vogël në rang global por edhe në nivel rajonal Serbia tani gjeneron 10 për qind të prodhimit të brendshëm bruto të saj nga teknologjia e informacionit. Eksportet e teknologjisë janë me vlerë 1 miliardë euro për këtë vit, nga rreth 900 milionë euro në gjithe vitin 2017, duke e vendosur atë në tre sektorët kryesorë të eksportit krahas makinerive dhe bujqësisë, sipas Ministrit të Financave Sinisa Mali.
Kompanitë serbe po prodhojnë programe kompjuterike për industritë që variojnë nga bujqësia në mjekësi, sikurse lojëra në internet apo testime. Ata gjithashtu po drejtojnë Call Center dhe linja për asistencë ndaj klientëve. Këtë vit ekonomia e Serbisë pritet të rritet 4%, sipas të dhënave të Bankës Qendrore, nga 2 % që u rrit në vitin 2017. Teknologjia e informacionit dhe komunikimit ka bërë që eksporti i shërbimeve të rritet 23% në gjysmën e parë të vitit 2018.
Në fushën e teknologjisë Serbia numëron sot mbi 2000 kompani, nga 700 që kishte vë vitin 2006. Të dhënat i përkasin Komisionit të Qeverisë për Mbrojtjen e Konkurrencës. Kjo rritje solli dyfishimin e të ardhurave në 1.5 miliardë euro.
Reuters shkruan se, nën udhëheqjen e Ana Brnabic, kryeministres 42-vjeçare serbe, e cila njihet edhe për aftësitë sipërmarrëse, Serbia po rrit përkrahjen për teknologjinë dhe po u bën thirrje kombeve të huaja të investojnë. Në strategjinë e tërheqjes së investitorëve, Serbia prezanton pagat e ulëta të punonjësve dhe subvencione deri në 10 mijë euro për punonjës.
“Informacioni, teknologjitë e përparuara dhe axhendat dixhitale janë e ardhmja e ekonomisë tonë” –tha presidenti i Serbisë Aleksandër Vuçiç për Reuters.
Sipas tij, “sektori IT i Serbisë është produkt i inteligjencës tonë…ne duhet të vazhdojmë të trajnojmë në këtë sektor sa më shumë njerëz të jetë e mundur”.
Ndërmarrjet kryesore, duke përfshirë Microsoft, IBM dhe Intel, kanë themeluar qendrat e zhvillimit në Serbi ose u kanë dhënë punë firmave lokale, duke ofruar paga që janë më shumë se tre herë më të larta se paga mesatare mujore e vendit prej 420 eurosh, por më të ulëta se ato në vendet e Bashkimit Europian.
Marrë nga Reuters
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto