Kredia për ekonominë shënoi rritje të papërfillshme në tre muajt e parë të vitit, duke paralajmëruar se aktiviteti kreditues mund të mbetet i plogësht edhe në 2016-n.
Të dhënat e fundit zyrtare nga Banka e Shqipërisë tregojnë se në mars, totali i huave që bankat kanë dhënë për ekonominë arriti në 547 miliardë lekë, nga 546.8 miliardë që ishte në fund të dhjetorit. Ndërsa nëse krahasohet me marsin e vitit të kaluar, kredia ka rënë me 10 miliardë lekë, ose 70 milionë euro.
Ekspertët e bankës qëndrore thonë se, rënia e kredisë në kushtet kur interesat e saj kanë zbritur në minimumin historik të të gjitha kohërave dëshmon oreksin e ulët të bizneseve, por edhe bankave për të marrë përsipër rrezikun.
Të dhënat e detajuara tregojnë se e gjithë rënia ka ardhur nga portofoli i huave të biznesit. Sipas Bankës së Shqipërisë, kredia që bankat kanë dhënë për biznesin ka rënë nga 365 miliardë lekë që ishte vjet në mars, në 354.9 miliardë këtë vit.
Në programin e reformave ekonomike 2016-2018, qeveria e cilëson stanjacionin e kredisë si rrezikun kryesor që mund të pengojë rimëkëmbjen e ekonomisë.
“Rritja e dobët e kreditimit mbetet shqetësimi më i madh për perspektivën e ekonomisë shqiptare”, thuhet në program. Sipas INSTAT, vitin e kaluar rritja ekonomike u udhëhoq nga investimet, ndërsa konsumi privat mbeti i ndrydhur.
Por a mund të vazhdojë rigjallërimi i investimeve pa u mbështetur me kredi? Ky mbetet shqetësimi më i madh, i pranuar jo vetëm nga qeveria por edhe Fondi Monetar Ndërkombëtar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
