Lufta për vëmendjen e njerëzve në botën e chatbot-ave është duke u ashpërsuar, dhe Google sapo lëvizi një copë të rëndësishme në këtë shah digjital.
Kompania njoftoi të enjten një funksion të ri të quajtur “switching tools”, mjete kalimi, që i lejojnë përdoruesit të transferojnë drejtpërdrejt në Gemini dy gjëra shumë të vlefshme: memoriet personale dhe historikun e bisedave nga chatbot-at e tjerë si ChatGPT dhe Claude.
Çfarë do të thotë kjo konkretisht?
Nëse ke kaluar muaj të tërë duke i mësuar ChatGPT-it se si të flasë me ty, çfarë preferon, si të quhen të afërmit e tu dhe ku ke rritur, nuk duhet ta fillosh gjithçka nga zero me Gemini. Me këto mjete të reja, mund ta “kopjosh” atë kontekst dhe ta ngarkosh direkt. Funksioni i memorieve funksionon kështu: Gemini të sugjeron një prompt që e fut te chatbot-i që po përdor tani. Ai chatbot gjeneron një përgjigje me informacionin tënd personal, ti e kopjon dhe e ngjit në Gemini. Gati Gemini di tashmë se je ti. Për historikun e bisedave, mjafton të ngarkosh një skedar ZIP. Shumica e platformave, përfshirë ChatGPT dhe Claude, e lejojnë eksportimin e bisedave në këtë format. Gemini i lexon dhe ti vazhdon bisedën nga ku e ke lënë.
Lexo edhe:SimUno, si po ndërton Dijedon Tahiri një startup global për internet pa roaming
Pse po e bën këtë Google?
Sepse numrat tregojnë se ka punë për të bërë. OpenAI njoftoi muajin e kaluar se ChatGPT ka arritur 900 milionë përdorues aktivë në javë. Gemini, megjithëse është i instaluar si parazgjedhje në Android dhe Chrome, ka mbetur prapa me 750 milionë përdorues aktivë në muaj. Lëvizja është e qartë: Google po ul sa më shumë pengesat për ata që duan të kalojnë, duke i thënë në fakt, eja, nuk humbet asgjë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
