Fitimet e grupit Volkswagen Group ranë ndjeshëm gjatë vitit 2025, duke e detyruar prodhuesin më të madh të makinave në Europë të përshpejtojë programin e kursimeve dhe të planifikojë shkurtimin e 50 mijë vendeve të punës në Gjermani deri në vitin 2030.
Sipas të dhënave të publikuara nga kompania, fitimi neto ra me 44% në 6.9 miliardë euro, duke shënuar rezultatin më të dobët që nga skandali i emetimeve. Të ardhurat mbetën pothuajse të pandryshuara në rreth 322 miliardë euro, ndërsa fitimi operativ pothuajse u përgjysmua në 8.9 miliardë euro.
Vendimi për shkurtimin e vendeve të punës u njoftua nga drejtori ekzekutiv Oliver Blume në selinë e kompanisë në Wolfsburg, duke tejkaluar planin e mëparshëm për reduktimin e 35 mijë vendeve pune të dakordësuar me sindikatat në vitin 2024.
Sipas drejtorit financiar Arno Antlitz, kompania po përballet me një mjedis të vështirë global, të ndikuar nga tensionet gjeopolitike, barrierat e reja tregtare dhe konkurrenca në rritje, veçanërisht nga prodhuesit kinezë si BYD, Geely dhe Nio.
Lexo edhe: OpenAI shtyn publikimin e ChatGPT-së për të rritur
Edhe pse kompania shënoi rritje në Europë, kjo nuk mjaftoi për të kompensuar rënien e shitjeve në Kinë dhe SHBA. Në total, Volkswagen dorëzoi rreth 8.98 milionë automjete në botë në 2025, një rënie prej 0.5%.
Vështirësitë janë ndjerë veçanërisht tek marka Porsche, e cila ka pësuar rënie të shitjeve në tregun kinez dhe po ndryshon strategjinë duke u rikthyer pjesërisht tek motorët me djegie të brendshme, pas fokusit të fortë tek makinat elektrike.
Megjithatë, pavarësisht rënies së fitimeve, bonuset për drejtuesit e kompanisë mbeten të larta. Sipas raportimeve, bordi drejtues ka marrë rreth 13.6 milionë euro bonuse, ndërsa drejtori ekzekutiv Oliver Blume ka përfituar një paketë kompensimi prej rreth 7.4 milionë euro.
Grupi pret që situata të përmirësohet në vitin 2026, me një rritje të marzhit operativ në 4%–5.5%, pas rënies në 2.8% gjatë vitit 2025.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
