Gjatë raportimit të rezultateve financiare për tremujorin e katërt, Spotify ka ndarë një deklaratë që ka ngjallur shumë diskutime në botën e teknologjisë: zhvilluesit më të mirë të kompanisë “nuk kanë shkruar asnjë rresht kodi që nga dhjetori”, falë përdorimit intensiv të inteligjencës artificiale.
Deklarata u bë nga bashkë-CEO i Spotify, Gustav Söderström, i cili shpjegoi se kompania po përdor AI për të përshpejtuar ndjeshëm zhvillimin e produkteve dhe lançimin e veçorive të reja. Vetëm gjatë vitit 2025, Spotify ka lançuar mbi 50 veçori dhe përmirësime të reja në aplikacionin e tij. Në javët e fundit, kompania ka prezantuar edhe funksione të reja si Playlists të sugjeruara nga AI, Page Match për audiobooks dhe About This Song, që u jep përdoruesve më shumë kontekst mbi këngët që dëgjojnë.
Në zemër të këtij transformimi qëndron një sistem i brendshëm i quajtur “Honk”, i cili përdor AI gjeneruese për të përshpejtuar proceset e kodimit dhe vendosjes së produkteve në prodhim. Sipas drejtuesve të Spotify, ky sistem u lejon inxhinierëve të ndërhyjnë në kod dhe të dërgojnë përditësime në kohë reale, edhe në distancë.
Lexo edhe: Nga kimikatet tek natyra,Shqipëria zgjeron kontrollin biologjik në prodhimin në sera
Söderström dha një shembull konkret: një inxhinier i Spotify, gjatë rrugës për në punë, mund t’i kërkojë Claude (AI që përdoret për kodim) përmes Slack në telefon që të rregullojë një gabim ose të shtojë një funksion të ri në aplikacionin iOS. Pasi AI e përfundon punën, versioni i ri i aplikacionit i dërgohet sërish inxhinierit në telefon, i cili mund ta miratojë dhe ta kalojë në prodhim, para se të arrijë në zyrë.
Sipas Spotify, kjo qasje ka përshpejtuar ndjeshëm ritmin e zhvillimit dhe lançimit të produkteve. Kompania e sheh këtë fazë jo si fundin e transformimit me AI, por si fillimin e një epoke të re për mënyrën se si ndërtohen produktet teknologjike.
Një tjetër element interesant që Spotify theksoi është ndërtimi i një dataset-i unik rreth preferencave muzikore, i cili nuk mund të “kopjohet” lehtë nga modele të tjera AI. Ndryshe nga burime si Wikipedia, në muzikë nuk ka gjithmonë përgjigje të sakta apo objektive. Për shembull, pyetja “çfarë muzike është e mirë për palestër?” merr përgjigje të ndryshme në varësi të kulturës dhe gjeografisë: në SHBA shumë preferojnë hip-hop, në Europë EDM, ndërsa në vendet skandinave heavy metal.
Sipas Söderström, ky është një aset i rrallë që Spotify po e ndërton në kohë reale dhe që përmirësohet sa herë që modelet e tyre ritrainohen.
Sa i përket muzikës së gjeneruar nga AI, Spotify tha se lejon artistët dhe label-et të tregojnë në metadata nëse një këngë është krijuar me ndihmën e inteligjencës artificiale, ndërkohë që platforma vazhdon të monitorojë dhe të luftojë përmbajtjet spam ose abuzive.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
