Expedia Group, gjiganti i udhëtimeve online, ka rritur ndjeshëm efektivitetin dhe eficiencën e marketingut përmes një transformimi shumëdimensional që ka prekur gjithçka, nga pozicionimi i markave deri te mënyra se si maten rezultatet.
Pse ka rëndësi ekselenca në marketing
Marketingu shpesh funksionon në “silo” të veçanta, si brenda ekipeve të brand-it dhe atyre të performancës, ashtu edhe i shkëputur nga biznesi në tërësi. Një qasje më holistike, e cila arrin të tregojë se si mesazhet më të forta dhe produktet më të mira punojnë së bashku për të rritur konvertimin, krijon një bazë shumë më të fortë për insight-e reale dhe ndikim konkret në biznes.
Më shumë investim, rezultate më të mira
Buxheti i marketingut të Expedia-s u rrit me 10% nga viti në vit gjatë tre muajve të fundit të 2025-ës, duke arritur në 1.7 miliardë dollarë. Në të njëjtën periudhë, kompania shënoi rritje vjetore të netëve të rezervuara në hotele me 9%, të rezervimeve nga konsumatorët me 5%, të rezervimeve biznes-me-biznes me 24% dhe të të ardhurave me 11%. Marketingu nuk ishte i vetmi faktor që ndikoi në këto rezultate, por Ariane Gorin, CEO e Expedia-s, e përmendi disa herë rritjen e efektivitetit dhe eficiencës së marketingut si një burim kyç të rritjes gjatë një thirrjeje me investitorët.
Pozicionim më i qartë i markave
Gorin u tha investitorëve se gjatë 12 deri në 18 muajve të fundit është bërë “shumë punë” për mënyrën se si janë pozicionuar markat e ndryshme të grupit. Expedia.com, sipas saj, shërben si një “one-stop shop”, ku mund të gjesh gjithçka për udhëtimin tënd. Hotels.com pozicionohet si një platformë e fokusuar te hotelet, me një propozim të fortë vlere përmes programit të besnikërisë, i reflektuar te “Save your way”, që u lejon anëtarëve të përdorin zbritjet gjatë rezervimit ose t’i ruajnë për më vonë. Vrbo, nga ana tjetër, është një marketplace për qira pushimesh, i mbështetur nga VrboCare, një politikë mbrojtjeje falas që ofron asistencë 24/7 për probleme si anulimet nga host-ët apo rastet e mashtrimit. “Ndjej se, veçanërisht krahasuar me një vit më parë, jemi në një pozicion të mirë me këto marka dhe në një pikë të shëndetshme për të rritur më tej,” u shpreh Gorin.
Lexo edhe: Klubi i librit Bytes & Books diskutim për ”Gjenitë e Biznesit” të Adrian Civicit
Kreativitet i fortë
Për Gorin, kreativiteti është një tjetër element thelbësor i suksesit të Expedia-s. Ajo theksoi se puna për të përforcuar propozimet e vlerës së markave përmes kreativitetit më të fortë e bën buxhetin e marketingut më efektiv. Një shembull konkret është reklama e Expedia-s në Super Bowl me personazhin Ken nga Mattel, shoqëruesi i famshëm i Barbie-s, e cila arriti shpejt mbi 250 milionë shikime në YouTube. Sipas saj, kur kreativiteti është i mirë, kjo ndikon drejtpërdrejt edhe në rritjen e eficiencës së investimit në marketing.
Lidhja mes marketingut dhe produktit
Gorin sugjeron se përmirësimet në produkt, si faqet më të shpejta, rekomandime më të mira, mjete të bazuara në inteligjencë artificiale dhe elementë të tjerë, ndikojnë drejtpërdrejt në rritjen e konvertimit. Por këto përmirësime nuk funksionojnë të izoluara. Sipas saj, gjithçka nis nga marketingu, nga njohja e udhëtarëve dhe ndërtimi i mesazheve që rezonojnë me ta, në mënyrë që marka të jetë “top of mind”. Marketingu i mbështetur thellësisht në insight-e të konsumatorit është pika e nisjes dhe më pas efekti i tij shumëfishohet falë përmirësimeve në produkt. Kjo do të thotë që, kur trafiku vjen në platformat e markave të Expedia-s, përdoruesit konvertojnë më mirë, duke e bërë çdo dollar të investuar në marketing më të vlefshëm.
Targetim më i zgjuar
Expedia po ndjek një qasje gjithnjë e më të orientuar nga të dhënat në marketing, duke përdorur targetim të personalizuar që në fazat e hershme të udhëtimit të klientit. Qoftë në rrjete sociale apo në kanale të tjera, përdoruesit shohin mesazhe që lidhen drejtpërdrejt me interesat dhe nevojat e tyre. Kur më pas ata kalojnë në platformat e markave të Expedia-s, u ofrohet kontekst i përshtatur për ta, çka rrit gjasat që të kryejnë rezervimin.
Vendosja e objektivave dhe matja e suksesit
Në bashkëpunim me drejtorin financiar të kompanisë, Scott Schenkel, Gorin i ka sfiduar ekipet e marketingut të përmirësojnë kthimin nga investimi. Kjo është mbështetur nga përmirësime në organizim dhe në aftësitë matëse, rritje të shpejtësisë së testimit të ideve dhe një kuptim më të thellë të vlerës reale të çdo investimi incremental. Expedia ka përmirësuar targetimin dhe mënyrën e matjes së performancës, ka ulur shpenzimet më pak efikase dhe ka rialokuar buxhetin drejt kanaleve që sjellin kthimin më të lartë të vlerës.
Përqafimi i inteligjencës artificiale
Gorin deklaroi se Expedia nuk ka vërejtur ndryshime domethënëse në trafikun nga Google, pavarësisht futjes së mjeteve të reja të bazuara në inteligjencë artificiale nga ana e kompanisë teknologjike. Megjithatë, Expedia po punon me platformat kryesore për të kapur kërkesën e udhëtarëve, duke u siguruar që markat e saj të shfaqen në mënyrë të dukshme në kërkimet e gjeneruara nga AI dhe të funksionojnë mirë në mjediset e shfletimit të automatizuar. Paralelisht, kompania po eksploron mënyra se si AI mund të përdoret edhe brenda platformave të saj, aty ku shumë konsumatorë e nisin natyrshëm kërkimin për udhëtime. Sot, rreth dy të tretat e rezervimeve të Expedia-s vijnë nga përdorues që e nisin udhëtimin e tyre të planifikimit direkt nga markat e kompanisë dhe këto rezervime direkte po rriten më shpejt se ato që vijnë nga kanalet indirekte.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
