Kina po hyn në Vitin e Ri Hënor me një seri lançimesh të reja në fushën e inteligjencës artificiale, duke forcuar pozicionin e saj në garën globale me Shtetet e Bashkuara. Gjigantë teknologjikë si Alibaba, ByteDance dhe Zhipu AI kanë prezantuar modele të reja në javët para festës më të madhe tradicionale në Kinë, ndërsa tregu pret edhe një version të ri nga DeepSeek.
Modelet e reja synojnë të përgatisin tregun kinez për një brez të ri “agjentësh AI” , sisteme që marrin vendime dhe kryejnë detyra komplekse, si navigimi në faqe interneti apo gjenerimi i përmbajtjes, pa ndërhyrje njerëzore.
Qwen3.5 i Alibaba-s
Pak orë para nisjes së festimeve më 16 shkurt, Alibaba prezantoi modelin e saj më të fundit, Qwen3.5. Sipas kompanisë, modeli kupton tekst, imazhe dhe video në mbi 200 gjuhë.
Qwen3.5 mund të aktivizojë agjentë AI deri në pesë herë më shpejt se modelet e mëparshme dhe rivalët e tij, përfshirë versionet më të fundit të OpenAI (ChatGPT) dhe Anthropic (Claude). Agjentët mund të plotësojnë formularë, të navigojnë faqe dhe të përfundojnë procese me shumë hapa.
Testet e hershme tregojnë se modeli mund të gjenerojë lojëra funksionale 3D, shfletues dhe faqe interneti, si edhe të analizojë imazhe mjekësore. Sipas kompanisë, ai është deri në 60% më i lirë se paraardhësi Qwen2.5. Në vitin 2025, Alibaba u angazhua të investojë 380 miliardë juanë (rreth 50.6 miliardë euro) në cloud dhe AI gjatë tre viteve të ardhshme, një nga investimet më të mëdha teknologjike në historinë e saj.
Lançimet e ByteDance
ByteDance, kompania që qëndron pas TikTok, njoftoi dy zhvillime të reja AI përpara Vitit të Ri Hënor.
Versioni i ri i chatbot-it Doubao 2.0 ofron arsyetim kompleks dhe ekzekutim detyrash me shumë hapa, në nivel të krahasueshëm me ChatGPT dhe Gemini.
Më 14 shkurt, kompania prezantoi gjithashtu SeeDance 2.0, aplikacionin e saj për gjenerimin e videove nga tekst ose imazh, që lejon krijimin e përmbajtjes audio-vizuale “immersive” me kontrolle të avancuara regjisoriale. Një video virale paraqet një përplasje në çati mes aktorëve amerikanë Tom Cruise dhe Brad Pitt.
Megjithatë, Shoqata Amerikane e Filmit kritikoi SeeDance 2.0, duke e akuzuar për përdorim në shkallë masive të materialeve me të drejtë autori pa mbrojtje të mjaftueshme. Përfaqësues të ByteDance thanë për BBC se do të forcojnë masat mbrojtëse për të garantuar respektimin e të drejtave të autorit.
Lexo edhe: Shpend Lila: Mungesa e domenit shtetëror po i kushton Kosovës miliona euro
GLM-5 i Zhipu AI
Zhipu AI prezantoi më 11 shkurt modelin open-source GLM-5, të projektuar për “inteligjencë agjentike”, arsyetim të avancuar dhe performancë të lartë në kodim, shkrim kreativ dhe zgjidhje problemesh.
Modeli mund të ndërtojë asistentë që planifikojnë, kërkojnë informacion, përdorin mjete të jashtme dhe menaxhojnë procese me shumë hapa për periudha të gjata. Ai është gjithashtu në gjendje të gjenerojë raporte të plota dhe të analizojë punime akademike të gjata.
GLM-5 përdor mekanizmin DSA të DeepSeek për të ulur kostot kompjuterike dhe për të rritur efikasitetin. Kompania pretendon se modeli është trajnuar tërësisht me çipa Huawei Ascend, duke arritur “pavarësi të plotë” nga gjysmëpërçuesit e prodhuar në SHBA – një hap i rëndësishëm drejt infrastrukturës së pavarur AI.
Në pritje: DeepSeek V4
DeepSeek pritet të lançojë versionin e katërt të modelit të saj rreth Vitit të Ri Hënor. Versioni i mëparshëm, V3, fuqizoi një aplikacion asistent që u bë aplikacioni falas më i shkarkuar në SHBA dhe globalisht, duke kaluar ChatGPT në janar të vitit të kaluar.
V3 tronditi tregjet globale, duke shkaktuar rënie të ndjeshme të aksioneve të kompanive teknologjike amerikane. Prodhuesi i çipave Nvidia pa aksionet të bien me 17%, duke humbur rreth 600 miliardë dollarë në kapitalizim tregu brenda një dite, përpara se të rikuperoheshin më pas.
Ndërkohë, disa vende europiane si Italia, Danimarka dhe Republika Çeke kanë ndaluar përdorimin e modeleve DeepSeek në pajisjet e agjencive qeveritare për shkak të shqetësimeve për sigurinë e të dhënave dhe kibernetikën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
