Autoriteti europian për mbrojtjen e të dhënave personale ka hapur një hetim ndaj platformës X, në pronësi të Elon Musk, lidhur me imazhet e seksualizuara të gjeneruara nga chatbot-i i inteligjencës artificiale, Grok.
Ky veprim shton presionin rregullator mbi X, e cila tashmë po përballet me hetime edhe në Francë dhe Mbretërinë e Bashkuar, pasi muajin e kaluar u publikuan mijëra imazhe “deepfake” me përmbajtje seksuale – kryesisht të grave, por edhe të fëmijëve – të krijuara përmes Grok, duke shkaktuar reagime të forta në nivel global.
Komisioni Irlandez për Mbrojtjen e të Dhënave (DPC), institucioni përgjegjës për zbatimin e Rregullores së Përgjithshme për Mbrojtjen e të Dhënave (GDPR) në Bashkimin Europian, njoftoi të martën se ka nisur një hetim “në shkallë të gjerë” ndaj X, lidhur me këto imazhe.
Në fokus të hetimit do të jetë nëse platforma X ka respektuar detyrimet e saj sipas rregullave europiane për privatësinë, veçanërisht në mënyrën se si ka trajtuar të dhënat personale të qytetarëve të BE-së.
“DPC ka qenë në komunikim me X që prej momentit kur u shfaqën raportimet e para në media, disa javë më parë, lidhur me mundësinë që përdoruesit e X të nxisin llogarinë @Grok për të gjeneruar imazhe të seksualizuara të personave realë, përfshirë edhe fëmijë,” deklaroi zëvendëskomisioneri Graham Doyle.
Lexo edhe:ChatGPT nuk është i vetmi chatbot që përdor Grokipedia-n e Elon Musk si burim
Sipas tij, hetimi do të shqyrtojë nëse X ka respektuar detyrimet themelore të parashikuara nga GDPR në lidhje me këtë çështje. CNN bëri të ditur se ka kontaktuar platformën X për koment, por nuk ka marrë ende një përgjigje.
Grok është zhvilluar nga startup-i i inteligjencës artificiale i Elon Musk, xAI, i cili vitin e kaluar bleu platformën X. Chatbot-i është i integruar drejtpërdrejt në rrjetin social.
Nën presionin e qeverive, përfshirë kërcënimet për ndalime dhe gjoba, X muajin e kaluar kufizoi aftësinë e Grok për të gjeneruar imazhe me përmbajtje eksplicite. Megjithatë, kompania vazhdon të jetë nën hetim në disa shtete europiane.
Në Mbretërinë e Bashkuar, Zyra e Komisionerit për Informacionin (ICO) njoftoi më herët këtë muaj hapjen e hetimeve formale ndaj X dhe xAI, lidhur me përpunimin e të dhënave personale nga sistemi Grok dhe potencialin e tij për të prodhuar imazhe dhe video të dëmshme me përmbajtje seksuale.
Ndërkohë, në fillim të shkurtit, policia bastisi zyrat e X në Paris, në kuadër të një hetimi më të gjerë ndaj kompanisë dhe Grok. Elon Musk u thirr gjithashtu për t’u marrë në pyetje. Në reagimin e saj, ekipi global i marrëdhënieve me qeveritë i X i mohoi akuzat dhe i cilësoi pretendimet që çuan në bastisje si “të pabazuara”.
Bashkimi Europian po e heton tashmë platformën X edhe për mënyrën se si ka vlerësuar dhe menaxhuar rreziqet që lidhen me integrimin e funksioneve të Grok në territorin e BE-së. Kontroversia rreth Grok ka rikthyer në qendër të debatit rolin e inteligjencës artificiale dhe rrjeteve sociale në krijimin e rreziqeve për të rinjtë dhe fëmijët. Të hënën, Mbretëria e Bashkuar njoftoi planet për të detyruar chatbot-ët e AI-së, përfshirë Grok, ChatGPT dhe Gemini të Google, të respektojnë ligje më të rrepta për mbrojtjen e përdoruesve nga përmbajtjet e paligjshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
