Gjëja numër 1 që njerëzit kërkojnë nga liderët e tyre nuk është besimi, stabiliteti apo edhe dhembshuria. Është shpresa. Sipas studimeve të Gallup, më shumë se gjysma e tipareve pozitive që njerëzit përmendin për liderët lidhen drejtpërdrejt me shpresën si cilësia kryesore që ata presin nga një udhëheqës.
Ky konstatim ka peshë të madhe sot, sepse ambienti i punës ndodhet në një gjendje të brishtë. Punonjësit janë të stresuar, largimet nga puna janë në rritje dhe niveli i angazhimit është i ulët. Gallup raporton se vetëm rreth 23% e punonjësve në mbarë botën e konsiderojnë veten të angazhuar në punë. Me fjalë të tjera, shumica janë ose emocionalisht të shkëputur, ose të demotivuar. Studime të mëparshme tregojnë se menaxherët ndikojnë deri në 70% të këtij realiteti.
Prandaj, pyetja nuk është nëse shpresa është e rëndësishme. Pyetja është nëse liderët po e krijojnë realisht atë tek njerëzit që udhëheqin.
Shpesh, shpresa ngatërrohet me optimizëm të verbër apo me entuziazëm sipërfaqësor. Por shpresa e vërtetë është ndryshe. Ajo i mban njerëzit të qëndrueshëm në të tashmen dhe i orienton drejt një të ardhmeje më të mirë. Ndërton reziliencë, nxit përpjekje shtesë dhe i bën njerëzit të duan të qëndrojnë, jo të largohen.
Lajmi i mirë është se nuk nevojitet të jesh një figurë e famshme apo një folës motivues për të krijuar shpresë. Shpresa ndërtohet në mënyrën se si udhëhiqet çdo ditë. Ja katër mënyra praktike se si liderët mund të ushqejnë shpresën në vendin e punës.
1. Ndërtimi i një vizioni të qartë
Shpresa ushqehet nga drejtimi. Kur njerëzit nuk e dinë se ku po shkojnë, dekurajimi shfaqet shpejt. Edhe nëse nuk janë të qarta të gjitha hapat, është e rëndësishme të ekzistojë një ndjenjë se rruga ia vlen. Vizioni nuk do të thotë të jepet një plan i detajuar për çdo hap. Do të thotë të krijohet një pamje e një të ardhmeje më të mirë dhe t’u kujtohet njerëzve se puna që bëjnë ka kuptim. Në periudha tranzicioni dhe pasigurie, njerëzit shpesh pyesin nëse ajo që po bëjnë ka ende vlerë. Roli i liderit në këto momente është të krijojë qartësi drejtimi, të japë kuptim dhe të përcjellë mesazhin se përpjekja ia vlen. Shpresa nis me një pamje të një të ardhmeje më të mirë. Njerëzit nuk ndjekin përsosmërinë. Ndjekin drejtimin.
Lexo edhe:Amazon dhe Google po fitojnë garën e investimeve në AI, por cili është çmimi i vërtetë?
2. Qëndrueshmëri dhe besueshmëri
Shpresa nuk mbijeton në një mjedis të paparashikueshëm. Kur njerëzit nuk e dinë çfarë të presin nga lidershipi, besimi dobësohet. Dhe kur besimi dobësohet, shpresa zbehet. Sipas Gallup, qëndrueshmëria krijon stabilitet dhe stabiliteti ushqen shpresën. Njerëzit nuk kanë nevojë për liderë spektakolarë, por për liderë të qëndrueshëm, të besueshëm dhe të parashikueshëm në sjellje. Mbajtja e fjalës, ndjekja e premtimeve dhe interesi i vërtetë për zhvillimin e njerëzve krijojnë një ndjenjë sigurie. Kjo siguri krijon hapësirë që shpresa të rritet. Shpresa nuk ndërtohet me fjalë të mëdha, por me veprime të vogla të përsëritura. Njerëzit nuk presin përsosmëri, por vazhdimësi.
3. Inkurajimi në mes të procesit
Fillimet shpesh janë entuziaste dhe fundet festohen kur rezultatet janë të dukshme. Por sfida e vërtetë është në mes të rrugës, kur progresi ngadalësohet, lodhja shtohet dhe motivimi bie. Në këto momente, roli i liderit është vendimtar. Inkurajimi nuk do të thotë të mohohen vështirësitë. Do të thotë të pranohen dhe njëkohësisht të inkurajohet vazhdimi i përpjekjes. Vlerësimi i njerëzve nuk duhet të lidhet vetëm me rezultatet përfundimtare. Inkurajimi ka ndikim më të madh kur jepet gjatë procesit, kur ende nuk ka siguri për rezultatin. Një prani e qëndrueshme dhe një mesazh i thjeshtë mbështetës mund të jenë më të fuqishme se çdo fjalim motivues. Kjo i ndihmon njerëzit të vazhdojnë edhe kur tundohen të heqin dorë.
4. Investimi në zhvillimin e njerëzve
Shpresa është e lidhur me të ardhmen. Kur njerëzit ndihen se po rriten dhe po zhvillohen, ata shohin kuptim në vazhdimësi. Kur ndihen të ngecur, motivimi bie dhe angazhimi zbehet. Studimet e Gallup tregojnë se ndjenja e zhvillimit personal lidhet drejtpërdrejt me shpresën dhe mirëqenien në punë. Kur ekziston hapësirë për rritje, njerëzit besojnë se e nesërmja ka vlerë. Lidershipi nuk ka të bëjë vetëm me arritjen e objektivave, por me ndërtimin e njerëzve që i arrijnë ato. Ky investim nuk kërkon domosdoshmërisht struktura të ndërlikuara, por vëmendje të qëllimshme: biseda të sinqerta për zhvillimin, sfida që ndërtojnë aftësi dhe interes përtej performanccës. Kur liderët investojnë në rritjen e njerëzve, shpresa merr formë reale.
Pse ka rëndësi lidershipi që ndërton shpresë
Këto katër praktika janë të thjeshta në dukje, por kërkojnë vëmendje të vazhdueshme në zbatim. Shumë liderë përqendrohen vetëm tek rezultatet, tek shifrat dhe performanca, duke harruar se rezultatet vijnë përmes njerëzve. Njerëzit rrallë mbajnë mend vetëm arritjet. Ajo që mbetet është mënyra se si janë trajtuar gjatë rrugës: a është ndërtuar besim, a ka pasur mbështetje në momentet e vështira, a është dhënë inkurajim dhe a është investuar në zhvillimin e tyre. Kjo është thelbi i qasjes ku “si” është më e rëndësishme se “çfarë”. Rezultatet kanë rëndësi, por mënyra e udhëheqjes ka ndikim më të madh afatgjatë. Ajo përcakton nëse njerëzit japin më të mirën, nëse qëndrojnë apo largohen, nëse ushqejnë shpresë apo dorëzohen. Të dhënat e Gallup e bëjnë të qartë: njerëzit kërkojnë shpresë nga liderët më shumë se çdo cilësi tjetër.
Pyetja mbetet e hapur: a po krijohet shpresë, apo vetëm zhurmë?
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
