“Made by Albanians”, startup-et që po lënë gjurmë në botë!

Disa sipërmarrës me origjinë shqiptare po ndërtojnë kompani që po shtrihen përtej kufijve rajonalë dhe po bëhen histori suksesi në tregjet ndërkombëtare. Me strategji të qarta, ekzekutim të qëndrueshëm dhe pa shumë zhurmë, ata po tregojnë se talenti shqiptar mund të konkurrojë në nivel global, nga teknologjia te shëndetësia e logjistika. 

Listën e startup-eve më të suksesshme të themeluara nga shqiptarë që nga viti 2016 do ta nisim me Slice, një platformë food-tech e specializuar për piceritë lokale në Shtetet e Bashkuara. Themeluar nga Ilir Sela, një sipërmarrës me origjinë nga Dibra, Slice sot punëson më shumë se 700 punonjës dhe ka kaluar kufirin e 100 milionë dollarëve në të ardhura vjetore. Qasja e saj ka qenë e thjeshtë në pamje të parë: t’u japë picerive familjare teknologjinë e duhur për të konkurruar me gjigantë si Domino’s dhe Uber Eats. Por është pikërisht kjo strategji e fokusuar dhe ndërtimi me kujdes i një ekosistemi mbështetës që e ka kthyer Slice në një lojtar të rëndësishëm në industrinë e porosive online.

Pak më larg nga New York-u, në Londër, një tjetër shqiptar nga Prishtina ka ngritur një tjetër perandori digjitale. Labinot (William) Zeqiri, përmes Fresha, ka transformuar mënyrën si funksionojnë bizneset e bukurisë dhe mirëqenies. Fresha është shndërruar në një platformë që u mundëson salloneve dhe klinikave të menaxhojnë rezervimet, pagesat dhe promovimin e tyre në mënyrë intuitive. Me mbi 475 punonjës dhe të ardhura që arritën në 43.4 milionë dollarë në vitin 2024, Fresha nuk është më thjesht një “startup”, por një motor i mirëfilltë tregtar për dhjetëra mijëra biznese të vogla në më shumë se 120 vende.