Koncepti i hapur është bërë simbol i apartamenteve moderne: më shumë dritë, më shumë ajër dhe një ndjesi luksi. Por realiteti shpesh është krejt ndryshe. Bashkimi i dhomës së ndenjës me tryezarinë dhe kuzhinën, në shumë raste, përfundon në rrëmujë vizuale, lëvizje të pakëndshme dhe humbje funksionaliteti. Ekspertët e dizajnit bien dakord: open space nuk është thjesht prishje muresh, por planifikim inteligjent.
Zonat pa mure, por me logjikë
Gabimi më i madh është krijimi i një hapësire të madhe pa orientim. Çdo zonë duhet të ketë identitetin e saj. Një qilim përcakton automatikisht zonën e ndenjës, ndërsa pozicionimi i tryezës sinjalizon hapësirën e ngrënies. Kur lëvizja është e lirë dhe pa pengesa, ambienti funksionon.
Stilet që nuk “grinden” mes tyre
Një nga arsyet pse open space dështon është përplasja e stileve. Dhoma e ndenjës moderne dhe tryezaria klasike krijojnë kontrast negativ. Sekreti është përsëritja e materialeve dhe toneve: dru, tekstura neutrale dhe ngjyra të balancuara krijojnë unitet vizual dhe elegancë.
Mobilimi që ndjek jetën reale
Në hapësirat e hapura, estetika nuk mjafton. Tryeza duhet të lejojë lëvizje të rehatshme të karrigeve, ndërsa garnitura duhet të orientohet drejt qendrës së ambientit. Funksioni vjen gjithmonë para formës.
Garnitura këndore, ndarësja më “inteligjente”
Në vend të mureve, garnitura këndore shërben si kufi natyror mes zonave. Ajo krijon ndarje vizuale pa e thyer hapësirën. Përmasat e balancuara dhe ngjyrat neutrale janë çelësi i suksesit.
Tryezaria që nuk e pushton ambientin
Një tryezë shumë e madhe e bën hapësirën të rëndë, ndërsa një shumë e vogël humbet në ambient. Proporcioni është vendimtar për një open space të suksesshëm.
Kolltukët, arma sekrete e dizajnit
Dy kolltukë të zgjedhur mirë mund të lidhin gjithë hapësirën. Ata shtojnë ngrohtësi, krijojnë balancë dhe e bëjnë ambientin më mikpritës.
Ndriçimi që ndan dhe bashkon
Një llambë e vetme nuk mjafton. Tryezaria kërkon ndriçim të dedikuar, ndërsa zona e ndenjës kërkon dritë të shtresuar. Ndriçimi i duhur krijon atmosferë dhe funksion.
Open space nuk dështon sepse është ide e keqe. Dështon sepse realizohet pa plan, pa harmoni dhe pa menduar për jetën reale. Kur bëhet siç duhet, hapësira duket më e madhe, më luksoze dhe më komode sesa kushton realisht.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
