Vetëm pesë ditë pas ndërhyrjes kirurgjikale, ai ishte në gjendje të drejtonte një karrocë invalidi, të shfletonte internetin, të luante videolojëra dhe të kontrollonte pajisje inteligjente në shtëpi.
Një burrë 28-vjeçar, i paralizuar prej tetë vitesh si pasojë e një dëmtimi të rëndë të palcës kurrizore, ka arritur të kontrollojë pajisje elektronike vetëm përmes mendjes, vetëm pak ditë pasi iu nënshtrua një operacioni për implantimin e një çipi në tru në Kinë. Ky zhvillim shënon një hap të rëndësishëm në kuadër të provës së parë klinike në Kinë për një ndërfaqe tru–kompjuter (BCI) plotësisht të implantuar, plotësisht pa tela dhe plotësisht funksionale. Teknologjia BCI lidh sistemin nervor të njeriut me pajisje që interpretojnë aktivitetin e trurit, duke i mundësuar përdoruesit të veprojë, si p.sh. përdorimi i kompjuterit apo lëvizja e një proteze, vetëm përmes mendimit.
Lexo edhe: Dashuri digjitale/Gruaja japoneze martohet me një personazh të krijuar nga AI
“Ai mund të kontrollojë pajisje shtëpiake dhe madje edhe të drejtojë karrocën e tij. Të gjitha këto janë të mundura,” deklaroi profesor Mao Ying, president i Spitalit Huashan pranë Universitetit Fudan. Pajisja është zhvilluar nga kompania Shanghai NeuroXess dhe përdor 64 elektroda, secila vetëm 1% e trashësisë së një fije floku njerëzor, duke e bërë një nga implantet BCI më të vogla dhe më pak invazive në botë. Elektrodat implantohen drejtpërdrejt në tru, ndërsa kontrolluesi, bateria, antena dhe procesori vendosen nën lëkurë, në pjesën e përparme të kraharorit.
Një dok stacioni për karikim pa tela, i ngjashëm me karikuesit e telefonave inteligjentë, i mundëson pajisjes të furnizohet me energji dhe të përdoret në mënyrë të pavarur. “Bateria e integruar është një hap shumë i rëndësishëm. Sigurimi i furnizimit të vazhdueshëm me energji dhe përdorimi afatgjatë janë thelbësore për aplikimin e kësaj teknologjie në trupin e njeriut,” u shpreh Zhang Xu, neuroshkencëtar dhe akademik i Akademisë Kineze të Shkencave. Një muaj e gjysmë pas operacionit, pacienti është në gjendje të kontrollojë pajisje inteligjente në shtëpi, të shfletojë internetin, të luajë videolojëra dhe të drejtojë karrocën e invalidit.
Prova të tjera klinike me BCI
Ekspertët theksojnë se pajisje të tilla mund të transformojnë jetën e miliona njerëzve në mbarë botën që jetojnë me paralizë. Një nga projektet më të njohura në këtë fushë është Neuralink, kompania e themeluar nga Elon Musk. Në një video të publikuar në platformën X, pacienti i Neuralink, Rocky Stoutenburgh, i paralizuar që prej vitit 2006, demonstroi aftësinë për të lëvizur një krah robotik vetëm me mendje, duke e afruar atë drejt fytyrës dhe duke e puthur. “Pjesëmarrësit në provat tona klinike kanë zgjeruar kontrollin digjital drejt pajisjeve fizike, si krahë robotikë ndihmës,” deklaroi Neuralink në X, platformë që zotërohet gjithashtu nga Musk. “Me kalimin e kohës, synojmë të zgjerojmë gamën e pajisjeve që mund të kontrollohen përmes Neuralink.” Musk bëri të ditur se më shumë se 10,000 persona janë regjistruar tashmë në listën e pritjes së Neuralink, me shpresën për të marrë pjesë në provat klinike të kësaj teknologjie revolucionare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
