Milarderët e teknologjisë Jeff Bezos dhe Elon Musk po garojnë për të qenë të parët që do të ndërtojnë qendra të dhënash për inteligjencën artificiale në hapësirë, raportoi të mërkurën Wall Street Journal, duke cituar burime të afërta me çështjen.
Kompania hapësinore e Jeff Bezos, Blue Origin, ka më shumë se një vit që po punon në zhvillimin e teknologjisë së nevojshme për krijimin e qendrave të të dhënave të AI në orbitë, sipas një personi të njohur me projektin.
Ndërkohë, SpaceX e Elon Musk planifikon të përdorë një version të përmirësuar të satelitëve Starlink për të mbajtur ngarkesa kompjuterike të dedikuara për inteligjencën artificiale. Sipas raportit, kjo teknologji është prezantuar si pjesë e një shitjeje aksionesh që mund ta vlerësojë SpaceX deri në 800 miliardë dollarë, duke u bazuar në diskutimet e personave të përfshirë.
Lexo edhe: Barometri i Ballkanit 2025, shqetësimi madhor i shqiptarëve janë çmimet e larta
Ideja e qendrave të të dhënave në orbitë po fiton gjithnjë e më shumë vëmendje nga gjigantët e teknologjisë, në një kohë kur qendrat tradicionale në Tokë po rrisin ndjeshëm kërkesën për energji elektrike dhe ujë, veçanërisht për ftohjen e serverëve.
Themeluesi i Amazon, Jeff Bezos, në muajin tetor parashikoi se qendra të dhënash në shkallë gigavati do të ndërtohen në hapësirë brenda 10–20 viteve të ardhshme, duke theksuar se energjia diellore e pandërprerë do t’i bëjë ato më efikase sesa qendrat tokësore. “Ne do të jemi në gjendje të tejkalojmë koston e qendrave të të dhënave në Tokë duke i ndërtuar ato në hapësirë, brenda dy dekadave të ardhshme,” u shpreh Bezos. “Këto klasterë gjigantë për trajnimin e AI do të jenë më të përshtatshëm për t’u ndërtuar në hapësirë, sepse atje kemi energji diellore 24/7. Nuk ka re, nuk ka shi dhe nuk ka ndikim nga kushtet e motit.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
