Dita e tretë e Javës Globale të Sipërmarrjes në Shqipëri u karakterizua nga një intensitet i lartë aktivitetesh që lidhën transportin, inovacionin, qëndrueshmërinë dhe rolin e teknologjisë në zhvillimin ekonomik. Dita nisi me konkursin “Transport, Inovacion, Siguri!”, ku studentë dhe të rinj prezantuan ide për rritjen e sigurisë dhe efikasitetit të transportit rrugor, duke sjellë qasje kreative dhe teknologjike për sfida konkrete të vendit. Paralelisht, në Piramidë u zhvillua sesioni final i Hackathonit të Gjelbër, i fokusuar te zgjidhjet pa plastikë si pjesë e projektit EU4Circular Economy, duke nxjerrë në pah potencialin e ideve të reja që synojnë një të ardhme më të pastër dhe më të qëndrueshme.
Një nga ngjarjet më të spikatura ishte Forumi Connect Albania, i cili vendosi në qendër vizionin për një Shqipëri plotësisht të digjitalizuar dhe të çliruar nga paratë fizike, duke krijuar një platformë rajonale unike që lidh politikëbërës, sektorin privat dhe aktorë të inovacionit. Ndërkohë, sipërmarrës të rinj dhe profesionistë morën pjesë në një trajnim të zgjeruar mbi kornizën ligjore dhe fiskale për të bërë biznes në Shqipëri, një program praktik që i pajisi pjesëmarrësit me njohuri të nevojshme për menaxhimin e nismave sipërmarrëse.
Lexo edhe: Si u ndërthurën siguria, AI dhe financat e gjelbërta në ditën e dytë të GEW Shqipëri?
Në Vlorë, Climobility City Lab vijoi me punën e tij për të nxitur zgjidhje inovative në mobilitetin e qëndrueshëm dhe reagimin ndaj valëve të të nxehtit, duke treguar se sfida klimatike po merr gjithnjë e më shumë vëmendje brenda ekosistemit të inovacionit. Po ashtu, në Piramidë u organizuan panele dhe sesione të dedikuara certifikimit, standardeve të cilësisë dhe rolin strategjik të diasporës shqiptare në ndërkombëtarizim, duke sjellë në vëmendje domosdoshmërinë e integrimit global të biznesit vendas.
Një tjetër aktivitet me rëndësi ishte prezantimi i EIT Manufacturing, i cili solli në Tiranë një perspektivë europiane mbi transformimin e sektorit të prodhimit, talentin dhe sipërmarrjen teknologjike. Studentët patën gjithashtu mundësinë të eksplorojnë nga afër ekosistemin vendor të teknologjisë gjatë Ditës së Inovacionit në Piramidë, ku u njohën me hapësirat, projektet dhe aktorët që po e shtyjnë përpara inovacionin në vend.
Pasditja u fokusua te investimet, me një workshop mbi zhvillimin e rrjetit të investitorëve engjëj, duke synuar forcimin e kapaciteteve lokale për financim në fazat e hershme. Dita u mbyll me një mbrëmje të dedikuar rrjetëzimit në komunitetin fintech, një hapësirë joformale që bashkoi profesionistë, investitorë, themelues startup-esh dhe entuziastë të teknologjisë financiare. Paralelisht, për të tretën ditë me radhë, në Universitetin Epoka vijoi gara e startupeve të gjelbërta, duke promovuar idetë e qëndrueshme të studentëve.
Në tërësi, dita e tretë e GEW Shqipëri 2025 u shënua nga një ndërthurje e fuqishme temash—transporti, digjitalizimi, diaspora, standardet ndërkombëtare, inovacioni industrial dhe financimi i startupeve—duke krijuar një peizazh të plotë të sfidave dhe mundësive që formësojnë zhvillimin e Shqipërisë.
Agjendën me eventet për çdo ditë të javës e gjeni këtu
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
