Irgen Kini, një CEO ndryshe: Teknologji me ndikim në jetën e njerëzve!

Nga Eni Muça – Nuk e ka ndërtuar karrierën mbi plane të qarta afatgjata. As mbi siguri. Por mbi kuriozitet, përkushtim dhe gatishmërinë për të ndryshuar drejtim kur duhej. Irgen Kini nuk është CEO për shkak të një titulli, por sepse rrugëtimi i saj drejt lidershipit është ndërtuar hap pas hapi, nga njohja me veten, nga gabimet e pranuara, nga përvoja teknike që u kthye në aftësi menaxhimi, dhe mbi të gjitha, nga puna reale me njerëz.Në këtë intervistë, Irgen flet hapur dhe tregon se si është të rritesh profesionalisht në një moshë kaq të re, të përballesh me dyshimet që të vijnë nga të tjerët, apo nga vetja dhe të gjesh mënyra të reja për të ndërtuar vlerë, jo vetëm në biznes, por në mënyrën si punohet në një skuadër!

Edhe pse në një moshë shumë të re, ju jeni në një rol shumë të rëndësishëm drejtues. Si do e përshkruanit rrugëtimin tuaj deri tani?

Rruga deri këtu ka qenë një udhëtim i pasur me sfida, mësime dhe shpërblime. Ka pasur momente kur vështirësitë më janë dukur të pakapërcyeshme, por ajo që kam kuptuar me kalimin e kohës është se çdo problem zgjidhet me durim, reflektim dhe mbështetje.

Kam mësuar rëndësinë e marrjes së kohës për të kuptuar qetësisht problemin, mbështetjes tek njerëzit e duhur, në punë, familje apo rreth shoqëror dhe ndryshimit të këndvështrimit, sepse shpesh zgjidhja fshihet tek mënyra si e sheh situatën. Është e rëndësishme të pranosh se nuk mund të kontrollosh gjithçka. Ndonjëherë, duhet t’i lejosh gjërat të rrjedhin natyrshëm, me besim dhe durim. Rrugëtimi im është shoqëruar me ndryshime të shpeshta drejtimi. Në fillim, ato sillnin pasiguri, por më ndihmuan të zgjeroj horizontin, të njoh më mirë veten dhe të kuptoj se çfarë di të bëj mirë, e ku të tjerët janë më të aftë se unë. Zgjedhja për të ndjekur informatikën në universitet nuk ishte pa dilema. Por sapo mora vendimin, u përkushtova maksimalisht. Fillova punë që në vitin e dytë të studimeve dhe vazhdova pa ndërprerje, edhe gjatë masterit në SHBA. Studimet në një nga universitetet më sfiduese në botë më dhanë një mënyrë të veçantë të të menduarit,  aftësinë për të strukturuar zgjidhje edhe në situata që duken të pazgjidhshme. Sot, edhe pse fokusi im është më shumë tek njerëzit dhe zhvillimi i biznesit sesa tek kodimi, këtë qasje e përdor çdo ditë. Tek Nebula, kam kaluar nga menaxhimi teknik në drejtimin strategjik të kompanisë. Kam gabuar, por kam patur mbështetje dhe këto gabime janë shndërruar në mundësi për rritje. Me kalimin e kohës, puna ime është përqendruar tek rritja e kompanisë, ndërtimi i marrëdhënieve afatgjata me klientët dhe identifikimi i mundësive të reja për zhvillim.