Instagram ka arritur tashmë në 3 miliardë përdorues aktivë mujorë, sipas njoftimeve të CEO-së së Meta-s, Mark Zuckerberg, dhe drejtuesit të Instagram-it, Adam Mosseri.
Ky është një moment historik i rëndësishëm për platformën në pronësi të Meta-s, e cila kishte regjistruar 1 miliard përdorues në vitin 2018. Mosseri theksoi në një video se rritja e viteve të fundit është nxitur kryesisht nga DM-të, Reels dhe rekomandimet. Për këtë arsye, Instagram do të vijojë të përqendrojë zhvillimin e aplikacionit tek këto tre elementë, duke e orientuar gjithnjë e më shumë rreth mesazheve direkte, videove të shkurtra dhe përmbajtjes së rekomanduar. Megjithëse kjo qasje ka sjellë rritje të ndjeshme, shumë përdorues janë shprehur të pakënaqur pasi preferojnë të shohin më shumë foto dhe përmbajtje nga miqtë e tyre, sesa postime nga llogari që nuk i ndjekin.
Lexo edhe:Ish-CEO i Google, Eric Schmidt paralajmëron: SHBA mund të humbasë garën për AI ndaj Kinës
Në muajt e ardhshëm, Instagram do të testojë një opsion të ri që u jep mundësi përdoruesve të rregullojnë më mirë algoritmin e Reels. Më pas, ky funksion mund të zgjerohet edhe në feed-et e tjera të aplikacionit. Shembull: nëse bazuar në aktivitetin tuaj Instagram ju rekomandon tema si futboll amerikan, fotografi analoge apo shah, ju do të mund të hiqni nga algoritmi një temë që nuk ju intereson më, për shembull futbollin amerikan, nëse ekipi juaj i preferuar nuk po performon mirë. Instagram po planifikon gjithashtu të ndryshojë shiritin e navigimit poshtë aplikacionit, duke e zëvendësuar butonin për ngarkimin e përmbajtjes me një qasje më të drejtpërdrejtë tek mesazhet direkte.
Këto zhvillime vijnë ndërkohë që Meta përballet me procese gjyqësore për blerjet e saj të Instagram dhe WhatsApp, të cilat dyshohet se kanë qenë antikonkurruese. Dokumente të brendshme të publikuara gjatë procesit tregojnë tensionet e mëparshme mes Facebook-ut dhe Instagram-it. Instagram është bërë sot më i rëndësishëm në aspektin kulturor se Facebook-u, duke ngritur shqetësime tek Zuckerberg se rritja e Instagram-it po ndikon në rënien e popullaritetit të Facebook-ut, sidomos tek të rinjtë. Për këtë arsye, Meta po përpiqet prej disa vitesh të gjejë mënyra për ta bërë Facebook-un “cool” përsëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto