Sipas Donna Morris, një sjellje specifike është flamuri i kuq më i madh që një punonjës nuk do të shkojë larg në karrierë: të jesh “Debbie Downer”, një person që shpërndan negativitet.
Morris, 57 vjeç, është nënkryetare ekzekutive dhe drejtuese e burimeve njerëzore në Walmart që nga viti 2020, ku ka ndikuar në përvojën e më shumë se 2.1 milionë punonjësve. Më herët, ajo kaloi 17 vite në Adobe në pozicione drejtuese të ndryshme dhe, përgjatë karrierës së saj, ka mësuar të dallojë me saktësi sinjalet paralajmëruese të një sjelljeje jo konstruktive në ambientet e punës. “Askush nuk dëshiron të punësojë një ‘Debbie Downer’,” tha ajo për CNBC Make It. “Ky është personi që është gjithmonë negativ, që vjen me problemin, por asnjëherë me zgjidhjen. Unë preferoj njerëzit që e sjellin problemin bashkë me një ide për si mund të zgjidhet.” Një “Debbie Downer” shpesh është edhe kundërshtues/e i ideve të reja, i mendimeve të kolegëve apo projekteve që kërkojnë energji dhe ndryshim. Një qëndrim i tillë mund të bëjë që të humbasin mundësitë për t’u lidhur me njerëz të rinj në kompani, apo të mos u besohet përgjegjësia e projekteve të reja nga drejtuesit. Nëse keni një koleg me këtë sjellje, “do t’ju mbështesë vetëm brenda një limiti shumë të ngushtë,” ka deklaruar më parë Juliette Han, neuroshkencëtare e trajnuar në Harvard, për CNBC Make It. “Mund t’ju dekurajojë që të eksploroni mundësi të reja në kompani, nëse këto nuk e përfitojnë drejtpërdrejt atë.” Megjithatë, kjo nuk do të thotë që duhet të shfaqni optimizëm toksik – pra të pretendoni se çdo gjë është mirë kur situata është objektivisht e vështirë. “Është jorealiste të jesh i/e lumtur gjithë kohës,” thekson Morris. Por nëse je vazhdimisht negativ/e, ndoshta është sinjal se nuk je në punën apo kompaninë e duhur.
Lexo edhe:Më shumë se një startup, historia që fshihet pas perandorisë Canva
Sipas Morris, disa sjellje dallojnë punonjësit më të suksesshëm nga ata që nuk ecin përpara në karrierë. Ajo vlerëson shumë njerëzit që “e përmbushin detyrën në kohën që pritet – apo më herët,” shprehet ajo. “Është më mirë të dorëzosh një punë më herët se sa vonë, dhe më mirë të ofrosh më shumë sesa më pak.” Një tjetër sinjal pozitiv është hapja ndaj mundësive të reja: “Punonjësit që ngrejnë dorën për të marrë përgjegjësi shtesë, që sjellin një problem bashkë me një propozim, ose kërkojnë ndihmë në kohë – para se ‘shtëpia të jetë në flakë’ – janë shembuj idealë.” Për të treguar një qëndrim bashkëpunues dhe proaktiv, mund të ofroni ndihmë pa qenë nevoja të kërkohet, si për shembull të mentoroni një praktikant apo të sugjeroni një ide që i jep zgjidhje një problemi të vazhdueshëm në departamentin tuaj. Po ashtu, sipas Michael Ramlett, CEO i kompanisë globale të inteligjencës së të dhënave Morning Consult, të tregosh një kureshtje të thellë dhe të qëllimshme – për shembull, duke hulumtuar mbi një mjet të ri të AI-së që po përdoret nga konkurrenca dhe duke ndarë gjetjet me menaxherin, është një tjetër mënyrë për të rritur besueshmërinë. Dhe nëse gjatë gjithë këtij procesi ndihmon edhe të tjerët, duke ndarë përvojën dhe njohuritë e tua, kjo është pika kulmore, përfundon Morris: “Njerëzit që ndihmojnë të tjerët janë flamuri jeshil i vërtetë.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
