Çdo prind dëshiron të jetë personi i parë që fëmija i tyre i drejtohet, për gjërat e mëdha, të vështira apo të gëzueshme. Ata duan që fëmijët të ndihen të sigurt për të bërë pyetje dhe për të ndarë emocionet. Por ndërtimi i këtij besimi nuk ndodh vetvetiu. Të thuash “Mund të flasësh me mua” nuk mjafton. Është sjellja e përditshme ajo që përcjell sinjalin se jeni një figurë e besueshme dhe e hapur. Këtu janë gjashtë mënyra të thjeshta, por të fuqishme, për të ndërtuar besim me fëmijën tuaj:
1. Flisni hapur për ndjenjat
Fëmijët mësojnë shumë përmes vëzhgimit. Kur ju shprehni emocionet tuaja, si gëzimin, shqetësimin apo zhgënjimin, ata kuptojnë se ndjenjat janë të natyrshme dhe nuk duhet të fshihen. Një shembull mund të jetë: “Po ndihem pak i shqetësuar sepse po vonohemi për në shkollë dhe punë. A do të më ndihmosh që të nxitojmë pak?” Duke normalizuar bisedat për emocionet, i mësoni fëmijët se ndjenjat nuk janë tabu, por pjesë e jetës së përditshme.
2. Mos i shmangni temat e vështira
Shmangia e pyetjeve të pakëndshme apo situatave të sikletshme — si vdekja e një insekti apo një person me aftësi ndryshe, i mëson fëmijët se ka tema “të ndaluara”. Në vend të kësaj, krijoni një mjedis ku kurioziteti pritet me qetësi dhe çdo pyetje është e mirëpritur. Edhe temat e ndjeshme mund të trajtohen me sinqeritet dhe dashamirësi.
3. Tregoni ndershmëri për sfidat tuaja emocionale
Nëse nuk jeni rritur në një familje që fliste lirshëm për emocionet, kjo nuk do të thotë që nuk mund të krijoni një përvojë ndryshe për fëmijën tuaj. Një mënyrë për të nisur është të ndani këtë vështirësi me të: “Unë nuk jam mësuar të flas për ndjenjat, por dua të filloj ta bëj me ty, sepse besoj se është e rëndësishme.” Kjo ndershmëri krijon lidhje të vërtetë dhe modelon se hapja emocionale nuk ka të bëjë me të qenit perfekt, por me përpjekjen dhe praninë.
Lexo edhe: Google pranon dështimin e sistemit të paralajmërimit për tërmetin në Turqi
4. Jepni shembull, jo pyetje të thata
Pyetja klasike “Si ishte dita jote?” shpesh merr si përgjigje një “mirë” të thatë. Në vend që të prisni që fëmija të hapet i pari, ndani ju diçka nga dita juaj: “Sot pata një ditë paksa të luhatshme. Në mëngjes u gëzova për diçka, por më vonë diçka tjetër nuk shkoi siç prisja dhe u ndjeva i mërzitur. Bëra një shëtitje dhe u ndjeva më mirë. Tani jam shumë i lumtur që jam me ty.” Kjo i ndihmon fëmijët të mësojnë si të reflektojnë dhe të ndajnë emocionet e tyre.
5. Bëjeni pjesë të rutinës suaj
Bisedat e sinqerta mund të bëhen pjesë e jetës së përditshme përmes ritualeve të thjeshta. Një shembull është loja “i miri, i keqi, i miri”, ku çdo anëtar i familjes ndan një moment të bukur nga dita, një moment të vështirë dhe një tjetër të mirë. Kjo i jep hapësirë si gëzimit ashtu edhe vështirësive. Edhe fëmijët më të vegjël do ta duan këtë rutinë dhe do të kërkojnë ta bëjnë çdo mbrëmje.
6. Mësoni strategji për përballimin e emocioneve
Pasi të flisni për ndjenjat, është koha për të ndarë edhe mënyrat se si i menaxhoni ato. Për shembull: “Kur ndihem i frustruar, më ndihmon të marr disa frymëmarrje të thella. Do të provojmë bashkë?” Kjo i mëson fëmijës se rregullimi emocional është diçka që mund të mësohet dhe praktikohet.
Besimi ndërtohet në momentet e vogla
Fëmijët nuk dëgjojnë vetëm fjalët tuaja, ata vëzhgojnë qëndrimin, mënyrën e të folurit dhe çfarë shmangni. Nëse dëshironi që fëmija t’ju besojë për çështjet e mëdha, tregojini se mund të mbështetet tek ju edhe për ato të voglat. Respektoni ndjenjat e tij, dëgjojeni me vëmendje, dhe krijoni një mjedis ku çdo bisedë është e mirëpritur, edhe kur është e vështirë apo e çrregullt. Kur jeni ju të parët që hapeni, i tregoni fëmijës rrugën. Dhe ai do të ndjekë shembullin tuaj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
