Pse mbledhjet po vrasin produktivitetin dhe si ta shpëtojmë kohën e punës?

Në një epokë ku puna hibride dhe oraret e zgjatura janë bërë normë, takimet duket se janë kthyer në një “vrasës të heshtur” të produktivitetit. Sipas raportit të vitit 2024 nga Fellow, punonjësit amerikanë kalojnë të paktën 20% të javës në takime, ndërsa për drejtuesit kjo shifër rritet deri në 35%. Por sa vlejnë këto takime dhe çfarë kostoje i sjellin biznesit?

Një studim nga Otter.ai dhe profesori Steven Rogelberg ka zbuluar se takimet e panevojshme dhe të shpërndara gjatë ditës mund t’i kushtojnë një kompanie mesatarisht 25 mijë dollarë në vit për çdo punonjës, për shkak të rënies së efikasitetit dhe humbjes së kohës për punë të thelluar.

Lexo gjithashtu: Si të nisësh një biznes me zero para? Ja çfarë të duhet në të vërtetë!

Takimet jo vetëm që ndërpresin fokusin, por edhe krijojnë mbingarkesë kognitive që e bën më të vështirë për punonjësit të hyjnë në gjendjen e përqendrimit maksimal, aty ku ndodhin idetë, zgjidhjet dhe inovacioni.

“Dy orë punë të pandërprerë vlejnë më shumë se katër orë të copëtuara nga takimet,” shprehet Alex Payetta, strateg suksesi në Ritualle. Shtimi i takimeve është kthyer në zëvendësues të gabuar për komunikimin informal nëpër zyra dhe, për fat të keq, ndonjëherë edhe si mjet për kontroll dhe monitorim të personelit.

Çfarë mund të bëjmë ndryshe?

Ekspertët propozojnë disa zgjidhje të thjeshta, por efikase:

• Takime në këmbë – Jo vetëm që përmirësojnë shëndetin fizik, por edhe shkurtojnë kohëzgjatjen e takimit.

• Axhendë e qartë – Pa një plan të ndarë 24 orë përpara, takimi nuk duhet të mbahet fare.

• Kufizim në kohë dhe pjesëmarrje – Takimet të zgjasin jo më shumë se 30 minuta dhe me maksimum 6 pjesëmarrës.

• Asnjë takim për përditësime – Këto mund të trajtohen lehtësisht përmes platformave si Slack apo email.

Me mbi 55 milionë takime në javë vetëm në SHBA, pyetja që ngrihet është: A po punojmë më shumë apo thjesht po ulemi më shumë në tryezat e takimeve?

Për të shpëtuar orët e arta të produktivitetit dhe për të rikthyer balancën punë-jetë, është koha që liderët të vlerësojnë vërtet nevojën për çdo takim. Sepse, siç thonë vetë punonjësit: “Ky takim mund të ishte një email.”

business.com