Shumica e njerëzve kontrollojnë telefonin menjëherë pasi zgjohen. Edhe pse rrjetet sociale mund të japin një ndjenjë të përkohshme kënaqësie për shkak të dopaminës, kjo formë kënaqësie e menjëhershme krijon një varësi për më shumë stimuj. Për më tepër, ekspozimi ndaj dritës blu nga pajisjet elektronike, në vend të dritës natyrale, ndërhyn në prodhimin e melatoninës, duke e bërë më të vështirë zgjimin e plotë dhe duke krijuar kushte për rraskapitjen e mëngjesit.
Çfarë është rraskapitja e mëngjesit?
Sipas Rea Frey, autore bestseller dhe eksperte e mirëqenies, rraskapitja e mëngjesit është ai rënie e papritur e energjisë dhe përqendrimit disa orë pas zgjimit. Shkaqet më të zakonshme përfshijnë nivele të paqëndrueshme të sheqerit në gjak, konsum të tepërt të kafeinës, cilësi të dobët të gjumit, dehidratim dhe çekuilibër hormonal.
Së bashku me bashkëshortin e saj, Alex Holguin, Frey ka krijuar lëvizjen “Unreachable”, e cila ndihmon njerëzit të shkëputen nga shpërqendrimet dixhitale dhe të krijojnë më shumë hapësirë për pushim, kreativitet, gëzim dhe lidhje të vetëdijshme. Kjo platformë përfshin Unreachable Journal, një podcast dhe një buletin falas.
5 zakonet më të këqija për të nisur ditën:
- Mbajtja e telefonit pranë shtratit ose përdorimi i tij si alarm.
- Vendosja e prioriteteve për lidhjet dixhitale përpara lidhjeve njerëzore.
- Nisja e ditës në modalitet reaktiv duke kontrolluar email-et dhe njoftimet e rrjeteve sociale.
- Pirja e kafesë menjëherë pas zgjimit, duke përkeqësuar dehidratimin e trupit.
- Qëndrimi brenda, nën dritë artificiale, pa ekspozim ndaj dritës natyrale.
6 alternativa të shëndetshme për të shmangur rraskapitjen e mëngjesit:
1. Pini çaj në vend që të lexoni në rrjetet sociale
Në vend që të hapni telefonin sapo zgjoheni, niseni ditën me një filxhan çaji bimor ose ujë të ngrohtë me limon dhe kripë deti. Kjo ndihmon në hidratimin e trupit dhe stabilizimin e niveleve të sheqerit në gjak.
2. Konsumoni një mëngjes të pasur me proteina
Në vend të ushqimeve me karbohidrate të rafinuara ose sheqerna, konsumoni një mëngjes me proteina për të mbajtur të qëndrueshëm nivelin e sheqerit në gjak dhe për të shmangur rënien e energjisë gjatë paradites.
3. Shtyni kafen për 60-90 minuta pas zgjimit
Konsumimi i kafeinës menjëherë pas zgjimit mund të ndërhyjë në ekuilibrin hormonal. Për këtë arsye, ekspertët rekomandojnë të hidratoheni fillimisht me një gotë ujë dhe një majë luge kripë deti dhe më pas të konsumoni kafenë.
4. Qetësohuni, mos u ndjeni të mbingarkuar
Shumë njerëz marrin frymë me gojë gjatë natës, gjë që shkakton dehidratim. Një mënyrë për të nisur më mirë ditën është frymëmarrja e rezonancës:
- Merrni frymë thellë për 5 sekonda nga hunda.
- Nxirreni frymën për 5 sekonda nga hunda.
Ky ushtrim ndihmon në rregullimin e sistemit nervor dhe kalimin në një gjendje të qetë. Po ashtu, dëgjimi i muzikës qetësuese ose tingujve të natyrës në mëngjes mund të jetë një alternativë e mirë ndaj rrjeteve sociale.
5. Zëvendësoni ekranin me natyrën
Ekspozohuni ndaj dritës natyrale brenda 30 minutave të para pas zgjimit. Kjo ndihmon në rregullimin e ritmit cirkadian, duke ndikuar pozitivisht në humor dhe përmirësuar cilësinë e gjumit gjatë natës.
Edhe një shëtitje e shkurtër në mëngjes, disa ushtrime të lehta apo thjesht shikimi i qiellit mund të rrisin nivelet e serotoninës – hormoni i “lumturisë”. Nëse keni pak kohë, nuk ka nevojë për një stërvitje të lodhshme – mjafton të ecni, të shtriheni apo të bëni disa lëvizje të vogla gjatë ditës.
6. Mbani shënime me dorë, në vend të aplikacioneve dixhitale
Në vend që të kontrolloni telefonin sapo zgjoheni, provoni të lexoni një faqe libri, të plotësoni një fjalëkryq apo të shkruani diçka në një ditar.
Sipas Frey, shkrimi me dorë ka një efekt pozitiv në organizimin e mendimeve dhe përcaktimin e synimeve për ditën. Kjo ndihmon jo vetëm në menaxhimin e stresit, por edhe në përmirësimin e vetëdijes dhe qartësisë mendore.
Bonus: Jepini përparësi lidhjeve personale
Në vend që të nisni ditën me nxitim, lini 10-15 minuta për të biseduar me partnerin, fëmijët apo edhe për të reflektuar me veten tuaj.
Frey dhe Holguin e kanë praktikuar këtë zakon që nga viti 2020 dhe theksojnë se ka ndryshuar rrënjësisht marrëdhënien e tyre. Duke diskutuar për emocionet, qëllimet dhe pritshmëritë, dita nis në një mënyrë më të vetëdijshme dhe të qëndrueshme.
Përdorni teknikat e përqendrimit për produktivitet më të lartë
Në vend që të shpërqendroheni nga mesazhet, email-et dhe rrjetet sociale gjatë punës, Frey rekomandon blloqe kohore të fokusuara:
- Punoni për 45 minuta pa ndërprerje.
- Merrni një pushim 15-minutësh për të qetësuar trurin dhe për të rikuperuar energjinë.
Ky cikël i përsëritur gjatë ditës ndihmon në përmirësimin e produktivitetit dhe përqendrimit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
