Është e vështirë të përcaktosh momentin e saktë kur fillon një ëndërrim me sy hapur. Mendja, kur endet, largohet pa paralajmërim, duke tërhequr mendimet drejt temave dhe ideve të ndryshme. Shpesh herë, ne e kuptojmë se kemi ëndërruar vetëm pasi jemi “zgjuar” prej tij, duke u kthyer në realitet dhe duke u fokusuar sërish te çfarë kemi përpara.
Fakti që ëndërrimi me sy hapur ndodh zakonisht në mënyrë të pavullnetshme mund të jetë një nga arsyet pse nuk i japim shumë rëndësi. Një tjetër arsye është se shpesh na largon nga detyrat që duhet të përfundojmë. Kjo e bën ëndërrimin të duket si diçka e padobishme, një proces që ndodh aksidentalisht kur humbasim fokusin – diçka që instinktivisht përpiqemi të shmangim. Por e vërteta është se ëndërrimi me sy hapur nuk është aspak i kotë. Studimet tregojnë se ai ofron përfitime të rëndësishme për trurin dhe mirëqenien tonë.
Pse ëndërrimi me sy hapur është i dobishëm?
Nëse e analizojmë më nga afër, nuk është e vështirë të kuptojmë pse. Fundja, ne nuk e nënvlerësojmë gjumin vetëm sepse nuk jemi drejtpërdrejt produktivë gjatë tij. Në të njëjtën mënyrë, nuk mund të qëndrojmë të fokusuar çdo minutë të ditës dhe kjo nuk është diçka negative. Është e rëndësishme që herë pas here mendja të “lirohet” dhe të ndiqet rrjedha e saj natyrale. Nga ana neurologjike, truri ynë kryen procese të rëndësishme gjatë këtyre momenteve. Një studim i Universitetit të British Columbia zbuloi një lidhje të fortë mes ëndërrimit të ditës dhe aftësive për zgjidhjen e problemeve. Para këtij studimi, shkencëtarët mendonin se mendja gjatë ëndërrimit aktivizonte vetëm rrjetin e paracaktuar të trurit – pjesën që merret me detyra të thjeshta apo rutinore. Por ata u habitën kur zbuluan se ëndërrimi me sy hapur përfshin edhe rrjetin ekzekutiv të trurit, që merret me detyra më komplekse dhe të ndërlikuara. Kjo ndërthurje i bën ëndërrimet të vlefshme për kreativitetin, produktivitetin dhe gjetjen e zgjidhjeve. Kur jemi të fokusuar, rrjeti i paracaktuar është i shkëputur, por gjatë ëndërrimit këto dy pjesë bashkëpunojnë, duke krijuar lidhje të reja. Gjatë këtyre momenteve, në mënyrë të pavetëdijshme, mendja jonë po përpunon informacion dhe po gjen frymëzim nga përvojat e ditës.
Ëndërrimi si burim kreativiteti
Nëse i pyesni njerëzit se kur u vijnë idetë më të mira, përgjigjet zakonisht do të përfshijnë aktivitete të thjeshta si dushi, ecja ose drejtimi i makinës. Këto aktivitete janë ideale për ëndërrim të lirë, që shërben si katalizator për kreativitetin, duke shkaktuar ide të papritura. Kur ëndërrojmë me sy hapur, ne gjithashtu i japim mendjes së fokusuar një pushim të nevojshëm. Sot jemi më të zënë se kurrë dhe shpesh nuk lejojmë veten të mërzitemi. Në vend të kësaj, kalojmë kohën duke parë apo lëvizur nëpër ekrane. Si rezultat, ëndërrimi ndodh më rrallë, duke na privuar nga përfitimet e tij. Kjo është arsyeja pse ëndërrimi i qëllimshëm mund të transformojë mënyrën tonë të të punuarit.
Lexo edhe:A e dini se cilët janë ligjet më të famshme në botë?
Si të praktikojmë ëndërrimin e qëllimshëm?
Studime të shumta kanë provuar se pushimet janë të dobishme për produktivitetin, ndërsa puna pa ndalesë çon në stres. Duke shtuar një praktikë të ëndërrimit të qëllimshëm gjatë këtyre pushimeve, efektet pozitive mund të shumëfishohen. Por si mund ta realizojmë këtë? Si çdo formë vetë-përmirësimi, edhe kjo kërkon strukturë dhe disiplinë. Për të qenë efektiv, është e rëndësishme të vendosim një qëllim të qartë dhe të ndërtojmë një rutinë që e mbështet këtë proces. Këtu janë tre hapa të rëndësishëm për të praktikuar ëndërrimin e qëllimshëm:
1. Vendosni një qëllim
Filloni duke përcaktuar një objektiv të qartë për seancën tuaj të ëndërrimit. Qoftë për të gjeneruar ide për një fushatë marketingu apo për të rritur energjinë tuaj kreative, qëllimi i saktë do të shërbejë si udhërrëfyes për mendimet tuaja. Për shembull, nëse po punoni për një projekt marketingu, mund të vendosni qëllim të gjeni dhjetë ide të reja. Nëse dëshironi të rrisni kreativitetin në përgjithësi, mund të vendosni të eksploroni perspektiva të reja për projektet aktuale. Një qëllim i qartë siguron që mendja juaj të endej me një synim produktiv.
2. Ushqeni mendjen tuaj të pavetëdijshme
Merruni me informacion që lidhet me qëllimin tuaj. Ky hap përgatitor mund të përfshijë rishikimin e projekteve të mëparshme, analizimin e fushatave të suksesshme ose kërkimin e thelluar për konkurentët. Duke ngopur trurin tuaj me informacion të rëndësishëm, krijoni një bazë të pasur mendore nga e cila mendja juaj e pavetëdijshme mund të tërheqë ide gjatë ëndërrimit. Për shembull, nëse dëshironi të inovoni në një industri specifike, lexoni për tendencat e fundit dhe sjelljen e konsumatorëve. Kjo përgatitje i mundëson mendjes të formojë lidhje të reja gjatë ëndërrimit.
3. Aktivizoni ëndërrimin me sy hapur
Angazhohuni në një aktivitet ritmik që lejon mendjen tuaj të endet lirshëm. Kjo mund të jetë një shëtitje e qetë, vizatimi në letër, ose kryerja e punëve të thjeshta shtëpiake. Aktivitetet që kërkojnë përpjekje minimale kognitive krijojnë hapësirën e përsosur për mendimin krijues. Gjatë një ecjeje, për shembull, lëvizja ritmike dhe peizazhi në ndryshim stimulojnë trurin për të formuar lidhje të reja. Zgjidhni aktivitete që ju vijnë natyrshëm dhe ju relaksojnë – mos e detyroni veten, por ndiqni atë që ndiheni më rehat duke bërë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
