Punonjësit ambiciozë shpesh marrin shumë këshilla në fillimet e karrierës për mënyrën se si të ecin para. Një këshillë e zakonshme është: Të jesh ndër të parët që vjen në zyrë dhe ndër të fundit që largohesh, për t’i treguar shefit se je i përkushtuar ndaj punës. Brianna Doe gjithashtu dikur e mendonte ashtu. Kur profesionistja e marketingut nisi karrierën e saj rreth një dekadë më parë, ajo shpesh shkonte herët në zyrë dhe punonte orë të gjata “për të treguar që kam dëshirë dhe motivim dhe se dua të rritem brenda kompanisë.”
Doe ishte e dedikuar t’i tregonte menaxherit të saj dhe kolegëve jashtë departamentit se mund të “bënte më shumë se ç’pritej,” dhe mendonte se “një mënyrë e shkëlqyer për ta bërë këtë ishte duke qenë e para që vinte në punë dhe e fundit që largohej,” tregon ajo për CNBC Make It. Megjithatë, “duke bërë këtë, përjetova cikle intensive të lodhjes dhe stresit” tregon ajo.
Duke reflektuar tani, Doe e kupton se këshillat e mira shpesh vijnë me paralajmërimin se orët e gjata të punës tregojnë përkushtim ndaj punës në kurriz të kohës dhe jetës personale.
“Nuk kisha asnjë lloj harmonie midis punës dhe jetës,” thotë Doe, e cila tani drejton agjencinë e saj të marketingut, Verbatim. “Sot besoj se ky është një koncept i vjetëruar, sidomos tani që kemi hyrë në një epokë të re, ku vendosja e kufijve dhe përparësia ndaj shëndetit mendor janë në plan të parë.”
Stacie Haller, këshilltarja kryesore e karrierës në ResumeBuilder me mbi 30 vjet përvojë rekrutimi, është dakord.
“Sot, njerëzit janë mjaft të zgjuar për të kuptuar se fakti që rri tetë orë në zyrë çdo ditë nuk do të thotë domosdoshmërisht se je një punonjës produktiv,” thotë ajo.
Në vend që të përqendroheni vetëm në orët e gjata të punës, ka shumë mënyra të tjera për të treguar se jeni të motivuar për punën tuaj dhe dëshironi të rriteni. “Krijoni marrëdhënie, gjeni një mentor, njihni apo bëhuni pjesë e një ekipi,” thotë Haller. “Vëzhgoni njerëzit e suksesshëm, shikoni se si punojnë dhe kërkoni këshilla.”
Punonjësit e gjeneratës Z, në veçanti, janë në një pozicion të mirë për të prioritizuar ndërtimin e marrëdhënieve të punës që mund t’i ndihmojnë në vitet e ardhshme, shton Haller: “Kjo është ajo që duhet të bëni në zyrë. Mos u përqendroni tek mbërritja herët dhe qëndrimi vonë thjesht për të krijuar idenë se jeni një punonjës i përkushtuar. Kjo nuk mjafton.”
Ky mesazh duhet të vijë edhe nga drejtuesit. Doe beson se shefat duhet të rishikojnë pritshmëritë e tyre nëse përqendrohen më shumë tek koha që një punonjës kalon në tryezë sesa tek ajo që arrin të përfundojë ose si e shpreh ambicien e tij. “Nëse një punonjës i ri po bën një punë të shkëlqyer dhe kërkon më shumë mundësi apo dëshiron të përfshihet në projekte të ndryshme, kjo ka më shumë rëndësi se dikush që thjesht qëndron më gjatë se ju,” thotë ajo.
Lexo edhe: Jo paratë, as fama: Një studim 85-vjeçar tregon se çfarë na bën më të lumtur
Megjithatë, Haller shton se është e rëndësishme të ndiqni shembullin e ekipit tuaj sa i përket kohës kur duhet të paraqiteni dhe largoheni nga vendi i punës.
Përshtatuni me kulturën e kompanisë: jini në kohë, mos u vononi, mos mungoni në takime dhe “mos përdorni justifikime të dobëta,” thotë Haller.
Në fund të fundit, ajo thotë: “Nëse të gjithë janë në punë nga ora 8:30 deri në 6, qëndroni edhe ju nga ora 8:30 deri në 6. Por nëse vini në punë në 7 vetëm për të treguar diçka dikujt tjetër përveç vetes tuaj, kjo është pak e çuditshme dhe jo efektive.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
