“Gjej një punë që e do dhe nuk do të duhet të punosh asnjë ditë të jetës tënde.” Ky citat i hershëm, i atribuar figurave si Mark Twain dhe Konfuci, nënvizon gëzimin e ndjekjes së një karriere të udhëhequr nga pasioni. Ndërsa kjo rrugë mund të mos jetë gjithmonë më fitimprurësja, shpesh sjell nivele më të larta të kënaqësisë në punë dhe në jetë. Por si mund ta zbuloni ‘niche’-n tuaj në treg? Si mund ta transformoni një pasion tuajin në një aktivitet fitimprurës? Në këtë artikull, eksplorohen gjashtë mënyra se si mund ta ktheni hobin tuaj në një aktivitet fitimprurës.
Eshtë e rëndësishme të theksohet se kthimi i një hobi në një karrierë mund të sjellë sfida. Pasioni juaj mund të bëhet pjesë e përditshmërisë tuaj, duke zvogëluar ndoshta gëzimin e tij. Kjo dilemë e vjetër sa koha nuk ka një përgjigje të vetme që i përshtatet të gjithëve, prandaj mendojeni me kujdes nëse jeni gati të ktheni një burim gëzimi personal në profesionin tuaj.
1.Përshtatini interesat tuaja me tregun
Para se të gjeni profilizimin tuaj, duhet të kuptoni pasionet tuaja. Çfarë bëni në kohën tuaj të lirë? A është sporti? A janë lojërat? A është muzika, punimet me dorë ?
Duke e kuptuar mirë çfarë ju pëlqen dhe si i kaloni orët tuaja të lira, mund të filloni të mendoni se si këto interesa mund të përputhen me nevojat dhe kërkesat e tregut. Ky është një hap thelbësor për të identifikuar një mundësi të qëndrueshme për të transformuar pasionin tuaj në një aktivitet fitimprurës në treg.
Ka një sërë pyetjesh për të bërë përpara se të hyni në treg. A ka kërkesë për atë produkt ose shërbim që ju mendoni të ofroni? Cila është përbërja e tregut, dhe niveli i sasisë së kërkesës për atë produkt? Cilët janë ofruesit kryesorë në tregun e produktit tënd? A ka një nevojë të paplotësuar te klientët e atij segementi tregu? Dhe nëse ka, cilat janë arsyet pse është ende e paplotësuar?
Ndonjëherë, një nevojë e paplotësuar në treg ekziston sepse njerëzit ende nuk kanë gjetur një zgjidhje. Dhe ndonjëherë, është e atillë sepse njerëzit janë përpjekur dhe kanë dështuar.
Hapja e një kafeneje pranë një kompleksi biznesesh ka më shumë gjasa të jetë fitimprurëse sesa hapja e një morti pranë Disneyland. Megjithatë, rrethanat tuaja unike mund të mos jenë aq të qarta. Pra, bëni kërkim të mirë përpara se të hidheni në treg dhe të ndërmerrni hapa investimi.
2. Njihni aftësitë tuaja
Duke njohur aftësitë dhe pikat tuaja më të forta, ju do ta përshtatni idenë tuaj të hobit për një produkt fitimprurës në treg në mënyrë unike. Për shembull nëse juve ju interesojnë harqet e shigjetave por jeni veçanërisht të mirë me fjalët, mund të filloni të shkruani ose të citoni informacione në një blog për harqet dhe harkëtarët; nëse jeni të zotë me mjetet, mund të mësoni të bëni vetë harqet tuaja dhe t’ua shisni ato. Jeni më të interesuar dhe të dhënë pas logjistikës? Ju mund të gjeni furnizues dhe të tregtoni harqe dhe pajisje të tjera të lidhura me atë niche. Nëse keni aftësi për komunikimin e informacioneve ju mund të mësoni të tjerët të përdorin harqe dhe shigjeta. Ka shumë rrugë për të fituar para për çdo interes. Ndaj është shumë e rëndësishme të kuptoni dhe të njihni më së miri veten tuaj dhe çfarë jeni të aftë të bëni më së miri.
3. Mbështetuni në përvojën tuaj
Mbështetuni në përvojën tuaj për të identifikuar pikat unike të nevojave të paplotësuara të klientëve në atë pjesë marketi ku ju synoni të hyni. Është më e lehtë për ju të kuptoni nevojat e audiencës tuaj të synuar, sepse ju jeni vet aktualisht pjesë e audiencës tuaj të synuar ndaj mund ta përshtasni produktin tuaj sa më mirë me ato nevoja që ju i shihni si të paplotësuara. Ju e dini se çfarë dëshironi dhe mund të lidheni më së miri me emocionet e audiencës tuaj të synuar, kështu që përdorni përvojën tuaj si pikënisje.
4. Krijoni një propozim vlere unike
Propozimi i vlerës unike është vendimtar për zhvillimin e markës suaj. Mos e ngatërroni me deklaratën e misionit . Përqendrohuni në atë që mund t’u ofroni klientëve tuaj dhe se si ajo ndryshon nga të gjithë të tjerët. Pra ju duhet të keni një avantazh konkurues.
5. Synoni zgjerimin e komunitetit tuaj
Meqenëse 92% e klientëve mbështeten te reklamat që ju tejçohen më së shumti nëpërmjet reklamave dhe transmetimit të fjalës, është lehtësisht e kuptueshme pse është i rëndësishëm ndërtimi i një komuniteti rreth produktit ose biznesit tuaj. Ndërtimi i një komuniteti rreth biznesit tuaj ju ndihmon të ruani një reputacion pozitiv dhe marrëdhënie të mira me klientët.Klientët e lumtur çojnë në më shumë referime te miqtë e tyre, gjë e cila nga ana tjetër do të ul kostot e marketingut për ju. Për më tepër, nëse krijoni një forum të dedikuar si psh reddit, discord ose rrjete të tjera sociale, klientët tuaj besnik mund të krijojnë përmbajtje për ju. Në marketing, përmbajtja e gjeneruar nga përdoruesit (UGC) shihet nga 85% e klientëve më me ndikim sesa përmbajtja e gjeneruar nga marka.
Lexo edhe: Çfarë bëjnë themeluesit e startup-eve në kohën e tyre të lirë?
Mendoni se sa shumë fansa besnik kanë personazhet e Game of Thrones, SpongeBob ose The Office. Askush nuk i paguante, megjithatë ata ende e bënë atë sepse i donin shumë personazhet dhe shfaqjet. Nëse i bëni fansat tuaj ta duan produktin tuaj, mund të krijoni një njohje të gjerë të brandit tuaj.
Gjithashtu klientët besnik dhe dashamirësit e markës tuaj janë gjithmonë më të hapur për të blerë produkte mbështetëse, të tilla si aksesorë, produkte me prodhim të kufizuar, duke ju lejuar të keni një burim të qëndrueshëm të ardhurash shtesë për përpjekje relativisht të lehta tuajat.
6. Mësoni nga konkurrentët tuaj
Hapja e një biznesi është vetëm gjysma e betejës. Mbajtja e një biznesi është shumë më e vështirë. Dy deri në pesë vitet e para të hapjes së biznesit janë kritik sepse përgjatë kësaj periudhe bizneset e reja të vogla mbyllen. Mënyra më e mirë për të arritur qëndrueshmëri është të mësoni nga më të mirët e fushës tuaj. Përpiquni të studioni suksesin e konkurentëve tuaj dhe të përsërisni elementët e tyre më ndikues në mënyrë të përshtatur me kontekstin e biznesit dhe klientelës që ju synoni. Studioni gabimet e tyre dhe dhe shmangini në rrugëtimin tuaj fitimprurës.
Një tjetër element thelbësore për t’u mbajtur mend është se markat kryesore konkurente mund të jenë thjesht të suksesshme sepse ishin të parat që hynë në treg. Ju do të duhet të luftoni në një terren të vështirë kundër familjaritetit që klientët kanë prej një kohe shumë të gjatë me bizneset kreyore në treg, por nga ana tjetër në plot raste është produkti i mirë ai që u ka garantuar suksessin ndaj dhe ju duhet të mësoni ti studioni ata për tu kuptuar ‘sekretet’.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
