Shqipëria vijon të renditet ndër vendet me emigracion të lartë. Diaspora jonë është ndër më të mëdhatë në botë, krahasuar me numrin e popullsisë në shtetin mëmë. Por, ka sipërmarrës vendas që na sjellin një qasje tjetër, rreth vendimit të tyre për të qëndruar në Shqipëri. Pikërisht në një nga eventet me temë emigracionin, zhvilluar së fundi në Tiranë, Valer Pinderi, themelues dhe drejtues i Aladini, ka mbajtur një fjalë rreth zgjedhjes së tij. Një mesazh për të gjithë shqiptarët, të cilin duam ta ndajmë me ju.
Sot u drejtohem të gjithë atyre që janë në dyshim apo të bindur se Shqipëria nuk është vendi i duhur për të jetuar.
Unë jam një person shumë aktiv. Kam themeluar dhe drejtoj Aladini.al prej më shumë se 10 vjetësh. Drejtoj shoqatën e tregëtisë në internet (AECA), jam folës në publik, trajnues, jam baba full time dhe së shpeji do të drejtoj një emision në radion më të madhe në vend. Aspiroj të bëj kompaninë e parë publike në Shqipëri dhe një prej kompanive më të mëdha ndërkombëtare shqiptare.
Me pak fjalë, jam deri diku i suksesshëm, e sigurt i lumtur. Vazhdoj të punoj për të arritur edhe më shumë çdo ditë në këtë Shqipëri që shumica duan të ikin.
E vetmja diferencë që kam me ata që duan të largohen, është se ata nuk e ndjenë veten 100% përgjegjës për fatin, lumturinë dhe suksesin e tyre. Ua japin një pjesë të kësaj përgjegjësie, të tjerëve: mësuesëve, prindërve, dhe disa më keq akoma shtetit ku jetojnë apo politikanëve që nuk kanë zgjedhur.
Unë mendoj që kjo bën diferencë totale në cilësinë e jetës së një njeriu, sepse, ndërkohë që unë ndihem 100% përgjegjës për fatin, suksesin dhe lumturinë time, jam gjithmonë në kërkim të shtegut për ta gjetur. Ndërkohë, të tjerët që nuk janë 100% përgjegjës për fatin e tyre nuk kërkojnë shtegun por gjejnë justifikime.
Në shkollë isha i pandërgjegjshëm për inpaktin që ky fenomen kishte mbi mua. Bëja fajtorë të gjithë dhe për mos suksesin tim. Por, gjithçka nisi të përmirësohet në momentin që vendosa të qëndroj në Shqipëri dhe të marr në kontroll jetën time.
Që nga ai moment, kur dikush thoshte këtu nuk ka biznese dhe biznesmenë të mirë, unë nuk trishtohesha dhe t’i bëja fajtorë, por hapa biznesin tim për ta bërë më mirë se ta.
Kur njerëzit thonë nuk ka shoqata që ndihmojnë realisht bizneset apo grupet në nevojë unë nuk u trishtova dhe nuk i bëra fajtorë, por insistova në themelimin e një shoqate, e cila do përpiqet të bëjë gjërat e duhura.
Lexo: Përmes një sateliti do të matet pjesa më e madhe e ujit në planet
Kur njerëzit thonë që Shqipërinë e kanë blerë disa oligarkë, unë shikoj historinë dhe kutpoj që ne jemi vetëm në fillimin e kapitalizmit. Nëse ankohemi për Shqipërinë, nuk e di se çfarë duhet thënë për shtetet që duam të largohemi, të cilat kanë qindra vite kapitalizëm. Fillimet e kapitalizmit në këto vende kanë qenë në kushte edhe më të favorshme për oligarkët dhe sërisht ato vende sot janë shpresa e botës. Kemi një rrugëtim të gjatë pëpara për të hequr dorë që në fillim.
Kur njerëzit thonë mediat janë të blera, unë shikoj një mundësi të jashtëzakonshme për gazetarë të pavarur që përdorin platforma si YouTube dhe rrjetet e tjera sociale, të cilat janë shumë herë më të fuqishme se mediat tradicionale sot në botë.
Kur njerëzit thonë nuk ka shëndetësi dhe arsim të mirë publik unë shikoj një arsye më shumë për t’u bërë më i aftë edhe për të fituar më shumë, që të mund të siguroj shëndetin më të mirë dhe arsimimin më të mirë.
Kur njerëzit shikojnë probleme tek politikanët e korruptuar, unë shikoj mundësi për lidera të rinj me forma të reja drejtimi.
Kur njerëzit që duan të largohen shikojnë një ekonomi të dobët të pashpresë, unë shikoj një platformë me kosto të ulët për të testuar aftësitë e mia si sipërmarrës.
Kështu miq kini kujdes nga çfarë besoni sepse ajo bëhet realitet. Nëse ju besoni se fatin tuaj e cakton një vend, atëhere vendi do caktojë fatin tuaj. Nëse ju besoni që fatin e përcaktoni ju, atëhere ka më shumë gjasa që të plotësoni ëndrrat tuaja.
Mos prisni që një vend të bëjë diçka për ju, sepse jeni ju ata që mund të bëni diçka për një vend.
Fillo tani merre në kontroll jetën tënde ose dikush tjetër do ta marrë për ty dhe gjasat janë të mos ju pëlqejë ai drejtim…
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
