Biletat për Konkursin e Këngës në Eurovision, që këtë vit mbahet në Vjenë, janë shitur në kohë rekord, me pothuajse të gjitha 90 mijë biletat që u blenë brenda pak minutash, njoftuan organizatorët.
”Biletat për Finalen e Madhe u shitën për vetëm 14 minuta, ndërsa biletat për të gjitha shfaqjet e tjera u përthithën brenda një ore”, bëri të ditur Unioni Evropian i Transmetuesve (EBU). Në total, gjatë javës së Eurovisionit zhvillohen nëntë shfaqje, përfshirë dy prova gjenerale përpara çdo transmetimi live.
”Çdo biletë e mbetur, për shembull nëse delegacionet kombëtare nuk i shfrytëzojnë të gjitha kuotat e tyre, do të hidhet sërish në shitje në një datë të mëvonshme”, tha EBU. “Reagimi ka qenë fenomenal”, deklaroi drejtori i Eurovisionit, Martin Green, në një komunikatë.
“Të shohësh që çdo shfaqje shitet kaq shpejt është një kujtesë e fuqishme për atë që përfaqëson Konkursi i Këngës në Eurovision , gëzim, bashkim dhe përvojë të përbashkët, në një kohë kur këto vlera janë më të rëndësishme se kurrë”, shtoi ai.
Edicioni i 70-të i Eurovisionit në Vjenë është shoqëruar prej muajsh nga debatet mbi pjesëmarrjen e Izraelit, në sfondin e fushatës së tij ushtarake dyvjeçare në Rripin e Gazës. Spanja, Irlanda, Islanda, Holanda dhe Sllovenia kanë deklaruar se do ta bojkotojnë edicionin e këtij viti të spektaklit muzikor, në shenjë proteste.
Në total, në konkurs do të marrin pjesë 35 shtete. Të 15 këngët që do të konkurrojnë në secilin prej dy gjysmëfinaleve u konfirmuan dje. Në gjysmëfinalen e parë, më 12 maj, Izraeli do të garojë për një vend në finale së bashku me këngë nga Greqia, Belgjika, Suedia dhe Kroacia, ndër të tjera. Gjermania, Franca, Italia, Mbretëria e Bashkuar dhe vendi pritës, Austria, kualifikohen automatikisht në finale më 16 maj dhe nuk kanë nevojë të garojnë në gjysmëfinale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
