Nëse ndiheni sikur dita juaj mbaron pa kuptuar se ku shkoi koha, nuk jeni vetëm. Të drejtuarit e një biznesi të vogël është si të jesh dirigjent i një orkestre që luan njëkohësisht disa partitura, nga menaxhimi i klientëve, financave, ekipit e deri te strategjitë e rritjes. Dhe ndërkohë që përpiqeni të bëni gjithçka vetë, koha është pasuria juaj më e çmuar. Pyetja është, a po e menaxhoni mirë kohën?
Në këtë artikull, sjellim 8 strategji praktike që mund të transformojnë mënyrën se si e organizoni ditën, në mënyrë që të punoni më zgjuar, të shmangni rraskapitjen dhe të përqendroheni te ajo që ka më shumë rëndësi, rritja e biznesit tuaj.
Lexo gjithashtu: Gen Z po udhëheq rikthimin në zyra – Ja si po e përdor këtë mundësi për të avancuar në karrierë
Organizimi nuk është luks, është domosdoshmëri
Një hapësirë e rrëmujshme krijon një mendje të shpërqendruar. Filloni nga tavolina, hiqni të panevojshmet, sistemoni dokumentet dhe kaloni sa më shumë në format digjital. Më pas, organizoni punën me objektiva SMART dhe ndahuni me listat e pafundme vendosni vetëm 5 prioritete kryesore për çdo javë. Për më tepër, identifikoni orët e ditës kur jeni më produktiv dhe rezervojini për detyrat më të rëndësishme.
Kthejeni telefonin në aleat, jo në shpërqendrim
Ka mijëra aplikacione për menaxhimin e kohës, por çelësi është të gjeni atë që i përshtatet nevojave tuaja. Aplikacione si:
-
Todoist për planifikim të qartë ditor,
-
Harvest për matjen e orëve të punës,
-
Trello për ndjekjen e projekteve në grup,
…mund të bëjnë ndryshimin mes një dite produktive dhe një kaotike. Pyetja që duhet t’i bëni vetes: “Çfarë më duhet realisht nga një aplikacion?” dhe jo “Cili ka më shumë opsione?”
Delegoni pa ndjenja faji
Sipërmarrësit shpesh bien në grackën e “heroit të vetëm”, por nëse doni të rriteni, duhet të mësoni t’u besoni të tjerëve. Në vend që të bëni gjithçka vetë, filloni duke deleguar detyrat që ju marrin më shumë kohë ose që zakonisht i shtyni. Nëse s’keni staf të brendshëm, gjeni bashkëpunëtorë të jashtëm për punë specifike. Investimi në delegim është investim në kohën tuaj.
Pajtimi me shifrat, jo shmangia e tyre
Menaxhimi i financave është shpesh kokëçarja më e madhe për sipërmarrësit. Por, me softuerët e duhur si QuickBooks, Xero apo MineralTree, mund të shmangni kaosin financiar dhe të kurseni orë të tëra stresuese. Sa më herët të vendosni një sistem, aq më pak kohë do t’ju marrë më vonë.
Lexo gjithashtu: Bankierët mund të pushohen nga puna, Gjenerata Z ka një plan tjetër për paratë
Luftoni shpërqendrimet si një profesionist
Në një epokë ku çdo njoftim i telefonit mund të prishë rrjedhën e punës, krijimi i një mjedisi të qetë është vendimtar. Vendoseni telefonin në “Do Not Disturb”, caktoni orare fikse për të kontrolluar email-in dhe rrjetet sociale, dhe përdorni mjete si SelfControl App për të bllokuar aksesin në uebsajtet që ju shpërqendrojnë. Përqendrohuni në 3 prioritete kyçe çdo ditë dhe shkruani ato para se të mbyllni ditën.
Rregulli i artë 80/20 – Punoni më pak, fitoni më shumë
20% e përpjekjeve tuaja sjellin 80% të rezultateve. Identifikoni ato detyra që kanë ndikimin më të madh dhe fokusohuni aty. Të tjerat? Delegojini ose thjesht lërini për më vonë. Jo gjithçka është urgjente dhe jo gjithçka është e rëndësishme.
Multitasking është një mit
Truri nuk është ndërtuar për të përpunuar dy detyra komplekse njëherësh. Çdo herë që kaloni nga njëra te tjetra, humbisni fokus dhe lodheni më shpejt. Aplikoni “time blocking”, planifikoni në mënyrë të qartë kohën për çdo detyrë dhe mos lejoni që njoftimet apo email-et të ndërpresin atë ritëm.
Jepini pushimit vendin që meriton
Pushimi është produktivitet. Idetë më të mira shpesh lindin kur jeni në një shëtitje, në dush ose duke u relaksuar me miqtë. Balancimi i punës me kohën për veten nuk është luks, por një strategji për të qëndruar energjik, kreativ dhe i përqendruar. Planifikoni pushime të vogla çdo ditë, jo vetëm për shëndetin tuaj, por edhe për shëndetin e biznesit.
Në fund të ditës…
Koha nuk është diçka që mund ta shtoni. Por mund ta përdorni më mirë. Menaxhimi i kohës nuk është vetëm teknikë, është stil jetese për çdo sipërmarrës që kërkon të ketë sukses, pa u djegur në rrugë.
Nëse doni që biznesi juaj të rritet, filloni duke menaxhuar më mirë… veten. Dhe gjithçka tjetër do të ndjekë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
