Protestat e pandalura kanë nxitur një ndërhyrje të pjesshme të qeverisë në rregullimin e tregut dhe amortizimin e çmimeve. Në daljet e fundit publike, përfshirë takimet me biznesin, Kryeministri Rama ka theksuar se buxheti i shtetit po mban një kosto të lartë të blerjes së energjisë. Gjatë takimit në një prej fabrikave të prodhimit të brumit, ai tha se çmimi i energjisë do të rritej me 7 herë, nëse nuk do të amortizohej nga buxheti.
Prej pak ditësh ndërkohë, çmimi i naftës është fiksuar në 217 lekë/litër. Rritja e theksuar e çmimit të naftës nxori në shesh mijëra qytetarë, ndërsa kryeministri prezantoi Paketën e Rezistencës Sociale. Më poshtë gjeni 7 pikat e ndërhyrjes.
1- Financim 3.6 miliardë lekë për të indeksuar pensionet. Kjo masë do të reflektohet që në pensionin e radhës të 673.542 pensionistëve.
2. Për 434 mijë përfitues, qeveria do të kompensojë me lekë në dorë, rritjen e çmimeve të shportës, e cila bazuar në përllogaritjen e INSTAT është 7% ose e kthyer në rritje mbi konsumin mesatar të përllogaritur përpara goditjes është 25 mijë lekë të vjetra plus.
Qeveria do të japë 30 mijë lekë të vjetra për 3 muaj rresht si kompensim për rritjen çmimeve të shportës, për:
-pensionsitët që marrin më pak sesa gjysma e pagës minimale,
-pensionistët e invaliditetit,
-pensionistët që jetojnë vetëm, (në kuptimin individualisht apo në çift)
-Persona me aftësi të kufizuar, paraplegjikë, tetraplegjikë apo të verbër dhe të gjitha familjet që janë aktualisht në skemën e ndihmës ekonomike.
Lexo: Çmimet rekord të gazit mund të jenë këtu për të qëndruar – ja sa mund t’ju kushtojë këtë verë
3- Mbështetja për fermerët me naftë pa taksa, (total 1.4 miliardë lekë ose 14 milionë USD), me një shtesë plus prej 5 milionë USD, e cila do të derdhet menjëherë.
4 – Qeveria do mbështesë shqiptarët që përdorin linja urbane qytetase dhe ndërqytetase, duke derdhur menjëherë 500 milionë lekë ose 5 milionë dollarë për të paguar diferencën e çmimit të biletës, në mënyrë që asnjë udhëtar të mos preket nga ndryshimi i çmimit, qoftë kur hipën në autobus brenda qytetit, apo për të shkuar nga një qytet në tjetrin.
5 – Do të sjellë 2 muaj përpara, futjen në fuqi të ligjit për zerimin e taksës për pagat deri në 400 mijë lekë të vjetra dhe përgjysmimin e taksës mbi pagat deri në 500 mijë lekë të vjetra, si dhe uljen e taksës mbi pagat nga 1,5 deri në 2 milionë lekë të vjetra.
6- Përshpejton dy muaj përpara futjen në fuqi të ligjit për pagën minimale, e cila në prill do bëhet 320 mijë lekë të vjetra.
7- Qeveria vendos menjëherë të shtojë 20 miliardë lekë të tjera, 200 milionë dollarë, në financimin e mburojës së çmimit të energjisë elektrike për familjet dhe bizneset e vogla.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
