55 mijë teste të shpejta ndaj Covid

Ministrja e Shëndetësisë dhe Mbrojtjes Sociale, Ogerta Manastirliu inspektoi pikën e testimit të shpejtë në qendrën shëndetësore të “Qytetit Studeti”. Ajo është një nga gjashtë pikat e kryerjes së testit të shpejtë në Tiranë.

Ajo bëri të ditur se deri tani janë kryer në të gjithë vendin mbi 55 mijë teste të shpejta.

Ministrja theksoi se, “Kemi hapur 51 pika të testimit të shpejtë në komunitet në të gjithë vendin. Dhe është një ndër sukseset e strategjisë sonë, pasi ajo çfarë po ndodh është që nuk ka më vonesa në kryerjen e testit. Ai kryhet nëpërmjet rezervimit online me mjekun e familjes. Deri më tani, me përfshirjen e testimit të shpejtë të antigentit, janë kryer më shumë se 55 mijë teste të shpejta në këto 51 pika testimi në të gjithë vendin. Pa harruar që po vijohet me testimin klasik, pra atë të PCR në të gjithë strukturat tona”.

Lexo: Zbulim i madh në luftën ndaj koronavirusit, krijohet pilula që mund të zëvendësojnë vaksinën

Sipas saj, strukturat e shëndetësisë janë në alert të shtuar, për shkak të shtimit të rasteve të variantit të ri të koronavirus në Europë.

“Në Shqipëri nuk kemi konfirmim të rasteve me variantin e ri të Covid19, por duhet të jemi vigjilent për të kapur në kohë rastet. Vijojmë të jemi në alert të shtuar, pasi numri i rritur i rasteve, edhe pse është një rritje e qëndrueshme, na vendosin në vigjilencë të shtuar. E njëjta vigjilencë kërkohet edhe nga qytetarët. Lufta vazhdon dhe jemi ende në mes të betejës”, tha ministrja

Lidhur me vaksinat anti Covid, Manastirliu tha se do të garantojmë furnizimin me vaksinën anti Covid përmes dy kontratave, drejtpërdrejt me Pfizer dhe nëpërmjet mekanizmit COVAX.